Qaraǵandy turǵyny 76 mln teńgege sıntetıkalyq esirtki ázirlegen

QARAǴANDY. QazAqparat - Tártip saqshylary sıntetıkalyq esirtki jasaǵan qaraǵandylyqty qolǵa túsirdi. Ustalǵan azamattyń páterinen 5 keli tyıym salynǵan zat tabyldy, dep habarlaıdy QazAqparat.

Aǵymdaǵy jyldyń 10 qazanynda «Qarasora-2020» jedel aldyn alý is-sharasyn júrgizý barysynda polıtsııa qyzmetkerleri aspaly dorba kótergen er adamdy ustady, onyń ishinde salmaǵy shamamen 750 gr aq tústi krıstaldy zat salynǵan tsellofan paketi bolǵan.

«Tergeý is-áreketterin júrgizý barysynda polıtsııa qyzmetkerleri ustalǵan adamnan jalpy salmaǵy 5 keliden asatyn esirtki zattaryn taýyp alyp, tárkiledi. Sondaı-aq páterde sıntetıkalyq esirtki daıyndaıtyn zerthana anyqtaldy.

Atalǵan fakti boıynsha QR QK 297-baby 1-tarmaǵy boıynsha qylmystyq is qozǵaldy», - dep habarlady oblystyq PD bastyǵy polıtsııa polkovnıgi Erlan Faızýllın.

Qara naryqta atalmysh esirtki zattarynyń quny shamamen 76,5 mln teńgege baǵalanady.

Aǵymdaǵy jyldyń basynan bastap Qaraǵandy oblysy PD esirtki qylmysyna qarsy is-qımyl basqarmasynyń qyzmetkerleri 4,5 tonnadan astam túrli esirtki zattaryn tárkiledi.