Qaraǵandy turǵyny 7 fırma ashyp, memleketke 280 mln teńge shyǵyn keltirgen

QARAǴANDY. QazAqparat - Qaraǵandy oblysynyń turǵyny 7 qolma-qol aqsha fırmasyn quryp, memleketke 280 mıllıon teńge shyǵyn keltirgen, dep habarlaıdy QazAqparat.

Qarajatty zańsyz qolma-qol aqshaǵa aınaldyrýdyń qylmystyq shemalarynda salyq tólemeıtin bir kúndik fırmalar paıda bolady jáne olar nóldik kórsetkishtermen esep beredi.

Qarjy monıtorıngi agenttiginiń Qaraǵandy oblysy boıynsha aýmaqtyq departamenti baqylaýdaǵy 7 kompanııanyń atynan jalǵan shot-faktýra shyǵarý faktisi boıynsha N. Kojemıakınaǵa qatysty sotqa deıingi tergeýdi aıaqtady.

2018-2020 jyldar aralyǵynda N. Kojemıakına basqa tulǵamen qylmystyq sóz baılasyp, múliktik paıda alý maqsatynda 7 kásiporyndy – «Read Oilers» JShS, «Gamma Proekt» JShS, «Stroıfırma Aster» JShS, «JOǴARY QURYLYS» JShS, «VIZÝVII» JShS, «Vostok 98» JShS, «Merıdıan 2020»JShS satyp alyp, basqa tulǵalarǵa tirkedi.

Osy kásiporyndardyń atynan kórineý jalǵan málimetteri bar býhgalterlik qujattar jazyldy.

Kontragent-kompanııalarmen jasalǵan mámileler sheńberinde qarajatty zańsyz qolma-qol aqshaǵa aınaldyrǵany úshin N.Kojemıakına mámileniń jalpy somasynyń 3% mólsherinde syıaqy alǵan.

Qylmystyq árekettiń nátıjesinde memleketke 280 mıllıon teńgeden astam mólsherde zalal keltirildi.

N. Kojemıakına sottaldy .