Qaraǵandy turǵyndary «soqqyǵa jyǵylǵan» qyzdarǵa kómektesýden bas tartty
QARAǴANDY. QazAqparat - Qaraǵandy turǵyndary bóten adamnyń basyna túsken qıyndyqtarynan aýlaq bolyp, jábirlengenderge kómek kórsetý úshin polıtsııa shaqyrýǵa asyqpaıdy - áleýmettik eksperımenttiń qorytyndylary osyndaı, dep habarlaıdy «QazAqparat» HAA tilshisi.
Jergilikti polıtsııanyń, Qazaqstan Ulttyq Jarty aı qoǵamy Qaraǵandy oblystyq fılıalynyń jáne «Mır dobra» qoǵamdyq birlestiginiń qyzmetkerleri turǵyndar arasynda bóten bireýdiń qaıǵysyna ortaqtasý, sezimtaldyq qasıetterin baıqap kórdi.
«Qyzdardyń biri kúıeýiniń únemi uryp-soǵatynyn aıtyp, adamdardan kómek surady. Grım sheberleri volonterdyń betine synǵan muryn, aǵyp turǵan qannyń sýretin salyp, qolyna jórgekke orap qýyrshaq sábı ustatty. Alaıda qyzǵa kómektesýge eshkim asyqqan joq. Azamattar tek aýrýhana men polıtsııa qaı jaqta ornalasqanyn kórsetýmen ǵana shekteldi», - deıdi jergilikti polıtsııa qyzmetindegiler.
Taǵy eki aktrısa kóshede adamdardy toqtatyp, ógeı ákesi uryp-soǵatynyn aıtyp, shaǵymdandy. Olardyń biri zeınetker áıeldiń aıaǵyna jyǵyla jalbaryndy. Biraq adamdar buǵan selqostyqpen qarady. Tek bir ǵana áıel qyzdardy polıtsııa bólimine deıin ertip baryp, ketip qaldy.
Statıstıkaǵa sáıkes, Qaraǵandy oblysynda jyl basynan beri áıelder quqyǵynyń buzylýy boıynsha 15104 aryz-shaǵym kelip túsken. Júrgizilgen taldaý negizinde 18-29 jas aralyǵyndaǵy 2892 áıel, 30-49 jas aralyǵyndaǵy 4864 áıel jáne 49-dan asqan 2915 áıel jábirlengeni anyqtaldy.
Bıyl daǵdarys ortalyqtarynyń senim telefondaryna 1263 áıel habarlasqan, sonyń 1042-si turmystaǵy kúsh kórsetýden japa shekken.
