Qaraǵandy topyraǵynan shyqqan boksshymyn - Álem chempıony Oleg Maskaev
ASTANA. QazAqparat - Búgin Astanaǵa at basyn burǵan ataqty boksshy Oleg Maskaev óziniń ataq-dańqyna tek Qaraǵandy boks mektebiniń arqasynda qol jetkizgendigin aıtty.
Aıta keteıik, Oleg Maskaev Qazaqstan týmasy, kásipqoı boksta 2006-2008 jyldary WBC nusqasy boıynsha álem chempıony atanǵan. Ol Qaraǵandyda ótkeli otyrǵan Ǵalym Jarylǵapov atyndaǵy halyqaralyq týrnırdi tamashalaýǵa kelgen bolatyn.
"Men ózim Qaraǵandy oblysy, Abaı aýdanynan shyqtym. Jarylǵapov atyndaǵy týrnırge san márte qatysyp, onda san márte jeńiske jetkenmin. Taǵdyr jazǵany bolar, áskerı qyzmetimdi Ózbekstanda ótkizdim de, sol jaqta úlken sportqa bet burdym. Degenmen men ózimniń boks mektebim Qazaqstanda, Qaraǵandynyń Abaı qalasynda qalyptasqanyn eshqashan umytqan emespin. Sol kezdegi jattyǵýlar, bokstaǵy alǵashqy qadamdaryma qoldaý kórsetken bapkerler jadymda. Ókinishke oraı úlken rıngte men Qazaqstan namysyn qorǵaǵan joqpyn. Ózbekstan atynan, keıin Reseı týynyń astynda óner kórsettim. Biraq men ózimniń shyqqan jerimdi úlken qurmetpen eske alyp júrdim, men - Qaraǵandydanmyn. Osy óńirden shyqqan barlyq boksshylardy tanımyn, olardyń ár qadamdaryn baqylap júremin. Qaıda bolsam da, Qaraǵandy jeriniń, Abaı jeriniń namysyn qorǵap júremin", - dep atap ótti ol.
