Qaraǵandy teatry Aq Jaıyq jurtshylyǵyna óz ónerlerin kórsetti
ORAL. QazAqparat - S.Seıfýllın atyndaǵy Qaraǵandy oblystyq qazaq drama teatry gastroldik saparmen Batys Qazaqstan oblysynda boldy, dep habarlaıdy QazAqparat tilshisi.
Halyqtar dostyǵy ordendi Qaraǵandy oblystyq drama teatrynyń bul shyǵarmashylyq sapary «Týǵan jerge taǵzym» dep ataldy.
Ótken jyly óziniń 85 jyldyǵyn atap ótken Arqadaǵy teatr mereıtoıdan bıyl da kende emes. Teatr akteri ári dramatýrgııa salasynda qalam terbep júrgen QR eńbek sińirgen ártisi, Memlekettik syılyqtyń laýreaty Keńes Jumabekov pen mádenıet qaıratkeri, «Qurmet» ordeniniń ıegeri Gúlsara Ráshqalıeva jetpis jastyń bıigine kóterilip otyr.
Aq Jaıyqtan túlep ushyp, Arqada tanylǵan qos óner sańlaǵy týǵan jerge taǵzym retinde teatr ujymymen birge Oral sahnasynda Aleksandr Galınniń «Qaıran, jas dáýren!» retroqoıylymy (rejısseri D.Espaev) men Keńes Jumabekovtiń «Adasqandar» dramasyn (rejısseri S.Jumaǵalı) qoıdy.
Oraldyqtar H.Bókeeva atyndaǵy BQO qazaq drama teatrynda qoıylǵan qos spektakldi de erekshe yqylaspen tamashalady. Ásirese, Islam dininiń atyn jamylǵan ótirik dinshilderdiń sózine ilesip, ata-anasyn tyńdamaı, jat aǵymdardyń jeteginde shet el asyp ketip, taǵdyry tálkekke túskender jaıyn ótkir qozǵaǵan «Adasqandar» dramasyn tolqymaı kórý múmkin emes. Mundaı qoıylymdar eń aldymen jastar úshin kerek.
«Bul sapar biz úshin aıryqsha este qalarlyqtaı boldy. «Qaz toıǵanyna emes, orǵanyna semiredi», degen, birneshe kún boıy kórermenderdiń alǵys-qoshemetine bólendik. Oblys basshysy Altaı Kólginov arnaıy qabyldap, qurmet kórsetti. Men ózim 70-ke kelsem, sonyń 50 jylyn Arqada ótkizdim. Búgin qandaı bıikterge qol jetkizsem, sonyń bári qara shańyraǵym - Qaraǵandy teatrynyń arqasy ekendigi aıdaı anyq. Óner sapary úzilmesin!» dedi Keńes Jumabekov.
