Qaraǵandy tarıhı-ólketaný murajaıynda úsh tildegi aýdıogıdtiń tanystyrylymy ótti
QARAǴANDY. QazAqparat - Qaraǵandy oblystyq tarıhı-ólketaný murajaıy óziniń 85 jyldyǵyn atap ótti, dep habarlaıdy óńir ákimdiginiń resmı saıty.
Mereıtoıǵa oraı mýzeıde «XXI ǵasyrdyń mýzeıi: mýzeılerdiń damýyndaǵy qazirgi zamanǵy tendentsııalar jáne perspektıvalar» atty respýblıkalyq ǵylymı-tájirıbelik konferentsııa boldy. Sondaı-aq «Saryarqanyń tarıhı-mádenı qundylyqtary» atty ǵylymı katalog pen «Tarıh jáne mýzeı» atty monografııanyń tusaýkeser rásimi uıymdastyryldy.
- Biz mereıtoıǵa oraı túrli ýaqyttarda bizge deıingi qyzmetkerler júrgizgen zertteýlerdi biriktirip, ǵylymı jınaq daıarladyq. Myna monografııa Qaraǵandy oblysynyń murajaı isi, óńir tarıhy týraly. Sondaı-aq ishine 300-den asa baǵaly jádigerlerimiz engen ǵylymı katalogty basyp shyǵardyq,- deıdi oblystyq tarıhı-ólketaný murajaıynyń dırektory Erjan Nurmaǵanbetov.
Mereıtoı qurmetine oraı uıymdastyrylǵan saltanatty sharaǵa Qazaqstannyń túrli aımaqtarynan mýzeı mamandary, ǵalymdar men mádenı-ǵylymı ortalyq ókilderi shaqyryldy.
Oblystyq tarıhı-ólketaný murajaıynyń úzdik qyzmetkerlerine qurmet gramotalary men alǵys hattar tabystaldy.
Sonymen qatar saltanatty shara barysynda aýdıogıdtiń tusaýkeseri ótti.
- Aýdıogıd - bul túrli tilderde jazylǵan ekskýrsııa, ony jádiger nómiri arqyly tyńdaýǵa bolady. Biz aýdıogıdtardy qazaq, orys jáne aǵylshyn tilderinde daıyndadyq. Bul jumystarǵa shamamen bir jyldaı ýaqyt ketti. Biz bul qurylǵylardy ózimizde jınaımyz, jabdyqtardy Qytaıdan ákelemiz. Baǵdarlamalyq qamsyzdandyrýdy ózimiz jazamyz,- deıdi «Nurly Ǵalam» JShS ókili Nurlan Garafıev.
«Nurly Ǵalam» JShS daıyndaǵan aýdıogıdter búginde Qazaqstannyń úsh qalasynda - Astana, Qaraǵandy jáne Pavlodarda bar. Oblystyq tarıhı-ólketaný murajaıynda tanystyrylǵan aýdıogıdke jeti tilde 350 faıl júktelýi múmkin. Murajaıǵa kelýshige bılet satyp alǵanda qurylǵy beriledi. Ol tyńdaıtyn tili men jádiger nómirin engizip, ekskýrsııany tyńdaı alady.
Kompanııa Qaraǵandy oblysy úshin barlyǵy osyndaı 160 aýdıogıd ázirlegen. Olardyń 40-y oblystyq tarıhı-ólketaný murajaıyna arnalǵan. Qalǵandaryn Jezqazǵan, Balqash, Qarqaraly murajaılary, Oblystyq beıneleý óneri murajaıy, Temirtaýdaǵy Tuńǵysh Prezıdent murajaıy men Dolınkadaǵy Saıası qýǵyn-súrgin qurbandaryn eske alý murajaıy ózara bólisti.
Qaraǵandy oblystyq tarıhı-ólketaný mýzeıi 1932 jyly 7 qarashada quryldy. Mýzeı qorynda 150 myńnan astam jádiger saqtalýda. Mýzeıde erekshe eki zal jumys isteıdi: «Babalar beıneleri» kompıýterlik anımatsııa zaly biregeı bolyp sanalady. 2011 jyly Qarqaraly aýdanyndaǵy Taldy-2 qorymyn zertteý nátıjesinde tabylǵan arheologııalyq jádigerler negizinde jańa ekspozıtsııa «Saq mádenıeti» zaly ashyldy.
