Qaraǵandy stomatologııasyndaǵy bala ólimi: Mınıstr dárigerdiń jazalanýyna pikir bildirdi

ASTANA. QazAqparat  - Búgin Úkimet úıindegi baspasóz máslıhatynda elimizdiń Densaýlyq  saqtaý mınıstri Qaraǵandynyń tis emhanasynda qaza bolǵan 2 jasar bala isiniń tergelý barysy jaıynda aıtty, dep habarlaıdy QazAqparat tilshisi.

«Atalǵan fakti boıynsha QR zańnamasyna sáıkes Qoǵamdyq densaýlyqty qorǵaý komıtetiniń aýmaqtyq departamenti tekserý júrgizip jatyr. Medıtsınalyq qyzmetkerlerdiń óz mindetterin tıisti deńgeıde oryndamaýy, medıtsınalyq kómek kórsetý erejeleri men standarttaryn saqtamaýy týraly másele týyndaǵan kezde komıtet nysanǵa baryp, tekserý júrgizedi. Onyń nátıjesi boıynsha materıaldar tergeý oryndaryna berilip, olar túpkilikti tergeý júrgizedi», - dedi ol.

Onyń aıtýynsha, odan keıingi sheshim sot tártibimen qabyldanatyn bolady.

«Degenmen, qazirgi ýaqytta atalǵan dárigerdiń de jaýapkershiligin qarastyryp jatyrmyz. Óıtkeni, buǵan deıin de sol dáriger medıtsınalyq kómek kórsetý standartyn buzǵan. Barlyq talaptardy eskere otyryp, Qoǵamdyq densaýlyqty qorǵaý departamenti onyń sertıfıkatyn alyp qoıý jáne basqa sheshim qabyldanǵanǵa deıin kásibı qyzmetin toqtatý týraly talap joldady. Medıtsınalyq aralasýdyń nátıjesinde adamǵa zııan keletindeı jaıt bolsa, onda mundaı jaǵdaılar zańnamaǵa sáıkes qaralýy tıis», - dedi Eljan Birtanov.

Aıta keteıik, 23 aqpan kúni Qaraǵandydaǵy stomatologııalardyń birinde  Reseı azamaty, 2 jasar Semen Arzamastsev qaıtys boldy. Anyqtalǵandaı, ol kúre tamyrǵa anestezııa egilgennen keıin qaza tapqan.