Qaraǵandy sodyrlar qolynan qaza tapqan taǵy bir sarbazdy sońǵy saparǵa shyǵaryp saldy

QARAǴANDY. QazAqparat – Qaza tapqan taǵy bir qaraǵandylyq sarbazdy týǵan-týystary aqtyq saparǵa shyǵaryp saldy. Antyna adal 28 jastaǵy kapıtan 7 qańtarda azamattyq boryshyn óteý barysynda qyrshynynan qıyldy, dep habarlaıdy QazAqparat tilshisi.

Keshe shahandyqtar áskerı qyzmetker Ádil Núrkenovti aqtyq saparǵa shyǵaryp saldy. Nebári 28 jastaǵy kapıtan Taldyqorǵandaǵy talqandaýdy kózdegen búlikshilerge toıtarys berý kezinde kóz jumǵan bolatyn.

Marqumnyń sońynda bir qyzy men jubaıy qaldy.

Beıbitshilik pen turaqtylyqtyń, otan aldyndaǵy erlik jolynda janyn pıda etken jaýyngerdiń erligi máńgilik el jadynda qala bermek.

Jańa jyl merekesine oraı Taldyqorǵanǵa arnaıy barǵan Ádil Núrkenovtiń ata-anasy uldaryn altynshy qańtarda sońǵy ret kórgen.

Jetinshi qańtarda kezekti jumysqa shyqqan áskerı qyzmetker áriptesimen kólikte otyrǵanda lańkester oq jaýdyrǵan.

Jańbyrsha jaýǵan oqtyń biri Ádil Núrkenovtiń búıregine tıgen.

«Qabyrǵamyzdy qaıystyrǵan qaıǵyly habardy estigennen beri áke-sheshesi esterin jııa almaı otyr. Beıbit kúnde osyndaı jaǵdaıdyń bolǵany janymyzǵa batady. Artynda qalǵan januıasynyń kúni ne bolady? Halyqqa qorǵan bolam degen maqsatynyń sońy osylaı aıaqtalǵany janyńdy aýyrtpaı qoımaıdy. Senbeske, kónbeske amalymyz joq», - deıdi marqum Á.Núrkenovtiń týysy Almagúl Imasheva.

Ulttyq qaýipsizdik komıtetiniń kishi jedel ýákili qyzmetin atqarǵan marqum Ádil Nurkenovke Prezıdent Qasym-Jomart Toqaevtyń jarlyǵymen «Jaýyngerlik erligi úshin» medali berildi.

Memleket basshysy tapsyrmasyna oraı, marqumdy jerleý men nesıesi bolsa tolyqtaı keshirý, qoldaý kórsetý sekildi mindetterdi ákimdik óz moıynyna alǵan.

Oblys ákiminiń orynbasary Abzal Núkenov aımaq basshysy atynan kóńil aıtý hatyn joldady.

QMDB bastamasymen Jalpyulttyq aza tutý kúnine oraı elimizdiń barlyq meshitterinde bir mezette Qasıetti Quran oqylyp, hatym duǵasy baǵyshtaldy.

Osy oraıda, «Ánet baba» meshitinde de marqumdardyń rýhyna duǵa jasaldy. 600 betten turatyn quran kitap tolyq oqyldy.

«Osy bir kúnderde biraz baýyrlarymyz baqılyqqa attandy. Marqum jandarǵa quran hatym oqyldy. Elimizdiń amandyǵy, beıbitshiligi jolynda marqum bolǵandarǵa jalpyulttyq aza tutý kúni arnaıy oqylyp otyr», - dedi oblystyń bas ımamy Ómirzaq qajy Bekqoja.