Qaraǵandy sımfonııalyq orkestrine Erkeǵalı Rahmadıevtiń esimi berildi
QARAǴANDY. QazAqparat - Qalı Baıjanov atyndaǵy kontserttik birlestiktiń sımfonııalyq orkestri XXHVІ kontserttik maýsymyn aıaqtady. Bul mýzykalyq kesh KSRO Halyq ártisi, Qazaqstannyń Eńbek Eri Erkeǵalı Rahmadıevti eske alýǵa jáne sımfonııalyq orkestrge saltanatty túrde onyń esimin berýge arnaldy, dep habarlaıdy QazAqparat tilshisi.
«Shalqyma» kontserttik zalynda Erkeǵalı Rahmadıevtiń klassıkalyq mýzykasynyń jankúıerleri ǵana emes, ataqty qazaq kompozıtorynyń týǵan-týystary, dostary men oqýshylary jınaldy.
«Erkeǵalı Rahmadıuly - meniń ustazym, meniń rektorym, bizdiń mınıstr, bizdiń rýhanı ákemiz. Biz oblys basshylyǵynyń orkestrge onyń esimin berýge jáne sol arqyly ony máńgi este saqtaýǵa sheshim qabyldaǵanyna óte qýanyshtymyz», - dedi TÚRKSOI uıymynyń Bas hatshysy Dúısen Qaseıinov.
Qaraǵandylyqtardy osy bir erekshe oqıǵamen quttyqtaýǵa QR Mádenıet jáne sport mınıstri Arystanbek Muhamedıuly da keldi.
«Búgin tarıhı kún. Óıtkeni biz búgin Erkeǵalı Rahmadıevtiń esimin elimizdiń aldyńǵy qatarly ujymdarynyń birine berýdemiz. Biz onyń shyǵarmashylyq jáne ómirlik joly týraly kóp aıta alamyz, ol óte mazmundy, kúrdeli jáne qyzyqty ómir súrdi. Ol Qazaqstandaǵy mádenıettiń órkendeýi úshin zor kúsh-jigerin saldy», - dep atap ótti mınıstr.
Qaraǵandy oblysynyń ákimi Erlan Qoshanov sımfonııalyq orkestr ujymyn aıtýly oqıǵamen quttyqtady. Dırıjer Petr Grıbanovqa orkestrge Erkeǵalı Rahmadıevtiń esimin berý týraly kýálikti tabys etti.
«Búgin óner keshi. Búgin Erkeǵalı Rahmadıevti eske alý keshin ótkizýdemiz dep aıtýǵa bolady. Biz Qaraǵandy sımfonııalyq orkestri men qurmetti, aıaýly kompozıtorymyzdyń arasyndaǵy erekshe baılanystyń kýágeri bolýǵa jınalyp otyrmyz. Kez kelgen qala óziniń sımfonııalyq orkestrimen maqtana almaıdy. Al bizderge, qaraǵandylyqtarǵa ózimizdiń ujdymymyzdy maqtan tutýǵa múmkindik bar. Bul bizdiń elimizdegi eń úzdik orkestrlerdiń biri», - dep atap ótti aımaq basshysy.
Sondaı-aq, oblys ákimi kompozıtordyń jubaıy Klara Rahmadıevaǵa jáne onyń balalaryna Balqash kóliniń janynda otyrǵan otaǵasynyń portretin syıǵa tartty.
