Qaraǵandy sheneýnikteri qyzmettik kólikti jeke maqsatta paıdalanbaıtyn bolady
QARAǴANDY. QazAqparat - Qaraǵandy oblysynda memlekettik organdardyń barlyq qyzmettik kólikterinde transportty jeke maqsatta paıdalanýǵa tyıymdy kózdeıtin belgi paıda bolady, dep habarlady «QazAqparat» HAA tilshisi.
Bul japsyrmalar memlekettik qyzmetshilerdiń qyzmettik kólikti jeke maqsatta paıdalaný faktilerin boldyrmaý maqsatynda engizileýde.
«Birinshi tamyzǵa deıin jergilikti atqarýshy organdardyń barlyq qyzmettik kólikterinde arnaıy belgi qoıylýy tıis. Bul qyzmettik kólikti jumystan tys ýaqytta jeke maqsatta paıdalanatyndarmen kúresýge járdemdesedi», - dep habarlady Qaraǵandy oblysy memlekettik qyzmet isteri jáne sybaılas jemqorlyqqa qarsy is-qımyl departamentiniń baspasóz qyzmetinen.
Japsyrmalar aldyńǵy esikterge - júrgizýshi men jolaýshy jaǵynan japsyrylýy tıis. Olar aýa raıy jaǵdaılarynda zaqymdanbaıtyn materıaldardan jasaldy. Aıta keteıik, memlekettik organdardyń qyzmettik kólikterine mundaı belgi tek Qaraǵandy oblysynda ǵana paıda bolady.
