Qaraǵandy saıabaqtarynda 2 myńǵa jýyq aǵash otyrǵyzylady
ASTANA. QazAqparat - Bıyl Qaraǵandyda 1798 aǵash otyrǵyzylady. Kóshetter Ortalyq mádenıet jáne demalys saıabaǵynda, Qazaqstan Táýelsizdigine 10 jyl saıabaǵynda, sondaı-aq Lenın kınoteatrynyń artyndaǵy gúl baǵynda paıda bolady. Bul týraly oblys ákiminiń resmı saıty habarlaıdy.
Saıabaqtar men gúl baqtary basqarmasynyń qyzmetkerleri barlyǵy 680 qaraǵaı, 300 jóke, 300 qaıyń jáne 518 úıeńki otyrǵyzýdy josparlap otyr. Eń kóp aǵashtar sany Ortalyq saıabaqtyń batys jaǵynda paıda bolady - 1468. Taǵy 300 aǵash Táýelsizdiktiń 10 jyldyǵy saıabaǵynda, Lenın atyndaǵy kınoteatr artyndaǵy gúl baǵynda 30 kóshet otyrǵyzylady.
Aǵashtar 27 sáýirde otyrǵyzyla bastaıdy. Qaıyń men qaraǵaılardyń sońǵy toptamasy kúzgi senbilikter kezinde, ortalyq saıabaqtyń batys bóliginde abattandyrý jumystary aıaqtalǵan soń egiledi.
«Aǵashtardy beıimdelip ketýi úshin óz topyraǵymen qosyp salamyz. Osylaısha tamyr júıesi zaqymdanbaıdy. Aǵash jaqsy jersinýi úshin, ony otyrǵyzǵan soń úsh jyl aralyǵynda baptalýy tıis», - dep túsindirdi Qaraǵandynyń Mádenıet, demalys saıabaqtary men gúl baqtary basqarmasy dırektorynyń orynbasary Talǵat Smaıylov.
Saıabaqtar jáne gúl baqtary basqarmasynda mamandar otyrǵyzǵan aǵashtardyń jersinýi 95-100% quraıdy. Qaıyń, úıeńki jáne jóke aǵashtarynyń eki metrlik kóshetterin Óskemendegi tálimbaqtardan, al qaraǵaı kóshetterin jergilikti jylyjaılardan alady.
Sonymen qatar óziniń týǵan qalasy, aýdany, aýylynyń kelbetine nemquraıly qaramaıtyn Qaraǵandy oblysynyń barlyq turǵyndary respýblıkalyq aǵash otyrǵyzý aktsııasyna qatysýǵa shaqyryldy. Atalmysh shara 21 sáýirde ótedi.
