Qaraǵandy saıabaǵynda mozaıka músinder qalpyna keltirildi
QARAǴANDY. QazAqparat – Qaraǵandynyń Ortalyq saıabaǵyndaǵy mozaıka músin alǵashqy qalpyna keltirildi. Nurlan Smaǵulov qorynyń qarjylaı qoldaýymen «Teńiz ertegisi» men «Otbasy» músinderi qalpyna keltirildi. Jobany Qaraǵandy oblysynyń ákimdigi de qoldady, al ýrbanıstıka ortalyǵy bastamashy boldy, dep habarlaıdy QazAqparat tilshisi.
Atalmysh saıabaq músinderi uzaq ýaqyt jóndeýdi qajet etti. Jabynnyń tutastyǵy buzyldy, smalta boıynda jaryq paıda bolǵan, tuǵyrlar qıraǵan, bloktardyń arasynan shópter ósip shyǵa bastaǵan.
Qalpyna keltirýge kirispes buryn qyzmetkerler músin avtorlarynyń jazbasha kelisimin aldy. Qalpyna keltirýge mozaıka avtorlarynyń biri Vıktor Arent qatysty. Smaltanyń (túrli tústi áınek, balqytý kezinde metall oksıdin qosyp túrli túske boıaý arqyly alynady) túpnusqasy, sondaı-aq aldyn-ala jasalǵan smalta elementteri qoldanyldy. Tuǵyrlarǵa kúrdeli jóndeý júrgizildi.
Músinderdiń ózderi ǵana emes, sonymen qatar aýmaqtary da retke keltirildi. Shamdar ornatylyp, qyrly tas tóseldi, trotýar jol salyndy. Sondaı-aq, gúlzar quryldy, aǵashtar otyrǵyzyldy, aınalasyna kógal shóp egildi. Avtomatty túrde sýarý júıesi ornatyldy. Jaqyn mańdaǵy aǵashtar da retke keltirildi – olardyń janynda jıek tastan gúlzar jasaldy.
Árbir músinniń janynda QR kody bar aqparattyq taqtaısha ornatyldy.
«Mozaıka qaraǵandylyqtar úshin erekshe mura, estelik retinde óte mańyzdy nysan. Qaraǵandy – monýmentaldy ónerdiń sany men sapasy jaǵynan eń baı oblys. Biz ony este saqtap, maqtanýymyz kerek. Bul bizdiń qaraǵandylyq ekenimizdi bildiredi. Jaqyn arada ýrbanıstıka ortalyǵynyń saıtynda oblystyń barlyq mozaıkasy boıynsha qysqasha sıpattamasy bar karta ornalastyrylady», – deıdi Qaraǵandy ýrbanıstıka ortalyǵynyń sýretshisi jáne jetekshisi Shyńǵys Qasymov.
