Qaraǵandy poıyzynda esirtki tasymaldaǵan adam ustaldy
ASTANA. QazAqparat - «Qaraǵandy-Qostanaı» baǵytyndaǵy jolaýshylar poıyzy vagondarynyń birinen esirtki tasymaldaǵan azamatty ustady, dep habarlaıdy departamenttiń baspasóz qyzmeti.
Kóliktegi ІІD Jolaýshylar poıyzdaryna ilesip júrý batalonynyń qyzmetkerleri «Jańa Qaraǵandy-Qaraǵandy-Suryptaý» ótkelinde «Qaraǵandy-Qostanaı» baǵytyndaǵy jolaýshylar poıyzy vagondarynyń birinen 1977 jyly týylǵan er azamatty ustady. Tekserý barysynda odan ózine tán ıisi bar jasyl tústi ósimdik tektes zat tabylyp, tárkilenip alyndy.
Saraptama qorytyndysyna sáıkes tárkilenip alynǵan zat jalpy salmaǵy 6 keli 355 gr. quraıtyn «keptirilgen marıhýana» esirtki zaty ekeni anyqtaldy.
Atalǵan fakt QR QK-niń 296-baby 4-bóligi boıynsha sotqa deıingi tergeýdiń biryńǵaı tizilimine tirkeldi. Ustalǵan azamat Qaraǵandy q. ІІB ýaqytsha ustaý ızolıatoryna qamaldy.
Qazirgi ýaqytta tergeý amaldary júrgizilýde.
