Qaraǵandy polıtsııasy qaza bolǵan atyraýlyq áriptesine arnap vıdeorolık túsirdi
QARAǴANDY. QazAqparat - Qaraǵandy oblystyq Polıtsııa departamentiniń qyzmetkerleri qaza bolǵan atyraýlyq polıtseı Shalqar Aqymǵalıevtiń erligine taǵzym etti. Qaraǵandylyq tártip saqshylar arnaıy vıdeorolık te túsirdi, dep habarlaıdy QazAqparat tilshisi.
Oblystyq Polıtsııa departamentinde «Erlik sabaǵy» uıymdastyryldy. Sharaǵa qatysqan jas qyzmetkerlerge Shalqar Aqymǵalıevtiń jasaǵan erligi týraly aıtyldy.
«Bul tek týystardyń ǵana qaıǵysy emes, bul bizdiń barlyǵymyzǵa ortaq qasiret. Shalqar júregimizde máńgige naǵyz batyr bolyp qalady. Osyndaı erjúrek ul tárbıelegeni úshin onyń ata-anasynyń aldynda bas ıemiz», - dedi Qaraǵandy oblystyq Polıtsııa departamenti Shtab-basqarmasynyń bastyǵy, polıtsııa polkovnıgi Natalıa Adıýkına.
Shara sońynda jınalǵandar nazaryna departamenttiń ishki jáne syrtqy baılanys basqarmasy túsirgen vıdeorolık kórsetildi. Onda polıtsııa qyzmetkerleri marqumǵa arnap shyǵarǵan óleń shýmaqtaryn oqyǵan.
Esterińizge sala ketsek, 21 naýryz kúni Atyraý qalasynda patrýldik polıtsııa serjanty Shalqar Aqymǵalıev sýǵa batyp bara jatqan áıeldi qutqaramyn dep ózi ajal qushty. QR Іshki ister mınıstrligi tártip saqshysy memlekettik nagradaǵa usynylatynyn málim etti.
