Qaraǵandy polıtsııasy at qulaǵyndaǵy chıptiń kómegimen barymtashylardy ustady
QARAǴANDY. QazAqparat - Qaraǵandy polıtseıleri jylqy qulaǵyndaǵy bırkaǵa bekitilgen elektrondy chıptiń kómegimen barymtashylar tobyn áshkereledi, dep habarlaıdy «QazAqparat» HAA tilshisi.
Mal urlaýshylar Sortırovka aýyly «Romashka» saıajaı qoǵamynyń mańyndaǵy ormanda kún saıyn jaıylatyn bir úıir jylqyny baqylaýǵa alǵan. Malshynyń kózin ala bere eki qylmysker óz attarymen kelip, bir úıir jylqyny aıdap áketken. Úıirde 31 jylqy bolǵan. Keltirilgen shyǵyn 4 mıllıon 30 myń teńgeni qurap otyr.
«Úshinshi qaskóı sybaılastarynan qońyraý kútip otyrǵan jáne urlanǵan jylqylardy jasyratyn oryn daıyndaǵan», - dep habarlady Qaraǵandy №2 Oktıabr aýdandyq sotynyń baspasóz qyzmeti.
Maldy sharýa qojalyǵynyń aýlasyna jasyrǵan. Jylqylardyń bir bóligi soıýǵa jiberilipti. Al qalǵan bóligi jedel áreket etken polıtseılerdiń kómegimen aman qaldy.
«Úıirde bir jylqynyń qulaǵyna elektrondy chıp bekitilgen, sol arqyly polıtseıler urlanǵan maldyń qozǵalysyn, ornalasqan jerin anyqtady. Іsti tergeý barysynda jylqylardyń qalǵan bóligi zardap shegýshige qaıtaryldy. Urylar jylqylardyń ıesine materıaldyq ótemaqy tóledi. Sol sebepti, zardap shegýshi sottalýshylarǵa bas bostandyǵynan aıyrmaıtyn jaza taǵaıyndaýdy surady», - dep habarlady sottyń baspasóz qyzmeti.
Sýdıa Galına Jılına úsh sottalýshynyń árqaısysyna shartty túrde 2 jyl jáne 7 aıǵa úkim kesti.
