Qaraǵandy polıtseıleri jol shetine shyǵyp ketken avtobýstyń 42 jolaýshysyn qutqardy
QARAǴANDY. QazAqparat – Qaraǵandy oblysy Shet aýdanynyń polıtseıleri jol shetine shyǵyp ketken qalaaralyq reıstik avtobýstyń jolaýshylary men júrgizýshisin qutqardy, dep habarlaıdy QazAqparat tilshisi.
4 jeltoqsanda tańǵy saǵat 16.00 shamasynda 28 jastaǵy júrgizýshi tizgindegen «Yotong» markaly avtobýs «Qyzylorda - Pavlodar» avtojolynyń 837-shaqyrymynda kóktaıǵaqqa baılanysty jol jıegine shyǵyp ketken. Avtobýs salonynda 42 jolaýshy bolǵan.
Oqıǵa ornyna Shet aýdany PB Seıfýllın aýyly polıtsııa bólimshesiniń bastyǵy, polıtsııa maıory Marǵulan Dúısembekov jáne ýchaskelik polıtsııa ınspektory Janat Maqashev shyqty. Tártip saqshylary qyzmettik avtokólikte qutqarý jumysyn uıymdastyryp, jolaýshylardy 12 shaqyrym jerde ornalasqan Shet aýdany Aqoı aýylynyń jaqyn eldi mekenine jetkizdi. Adamdarǵa kafede tamaq berildi. Zardap shekkender joq.
Qaraǵandy oblysynyń polıtsııa departamenti aldaǵy kúnderi sınoptıkter qar jaýatynyn jáne jolda kóktaıǵaq bolatynyn eskertedi.
Osyǵan baılanysty kólik júrgizýshileri jolda, ásirese balalar oqıtyn oryndardyń janynda, qoǵamdyq kólik aıaldamalarynda, jaıaý júrginshiler ótkelderinde barynsha saq bolyp, jyldamdyq rejımin, qashyqtyqty jáne jol qozǵalysy erejeleriniń basqa da talaptaryn saqtaýy tıis.
Jaıaý júrginshiler joldan ótý kezinde avtomobıldiń tejeý joly dymqyl jáne taıǵaq jolda ulǵaıatynyn eskerýi qajet.
