Qaraǵandy polıtseıleri tolǵaǵy qysqan áıeldi perzenthanaǵa jetkizdi
QARAǴANDY. QazAqparat – Qaraǵandy olıtseıleri tolǵaǵy qysqan júkti áıeldi jedel túrde perzenthanaǵa jetkizýge kómektesti. Júkti áıel kúıeýimen birge Qarqaraly aýdanynan shyǵyp Qaraǵandynyń perınataldy ortalyǵyna asyqqan. Jolda erli-zaıyptylar polıtseılerden kóligin Qaraǵandyǵa deıin alyp júrýdi suraǵan. Patrýl qyzmetkerleriniń kómeginiń arqasynda áıeldi perzenthanaǵa der kezinde jetkizý múmkin boldy, dep habarlaıdy QazAqparat tilshisi.
26 qazan kúni saǵat 05:00 shamasynda «Pavlodar-Qarqaraly» avtojolynda Qaraǵandyǵa kire beriste er adam patrýldik polk qyzmetkerlerine júgingen.
«Patrýldik polıtsııa polki quramynda polıtsııa aǵa leıtenanty D.S. Orynbek pen polıtsııa aǵa leıtenanty D.E. Eginbaı mal urlyǵyna qarsy is-qımyl jónindegi jedel-aldyn alý is-sharasy kezinde «Qaraǵandy-Pavlodar» avtojolynda blokbekette boldy. Tańǵy saǵat 5.00-de olarǵa kúmis tústi Aýdı 100 avtokóligi kelip, onyń júrgizýshisi Qaraǵandy polıtsııa qyzmetkerlerinen Mıhaılov aýdanyndaǵy perzenthanaǵa ertip júrýin ótinip, kómek suraǵan. Sebebi kólik salonynda sýy ketip, tolǵaǵy bastalǵan jubaıy bolǵan. Osydan keıin patrýldik polıtsııa polkiniń qyzmetkerleri áıeldi perzenthanaǵa 10 mınýt ishinde jetkizdi», - dep habarlady Qaraǵandy oblysy PD baspasóz qyzmeti.
«Biz túnde Qaraǵaıly aýylynan Qaraǵandyǵa shyqtyq. Dárigerler jubaıyma kesar tiligin jasaý kerek degen bolatyn. Sol túni aıaq asty tolǵaǵy bastalǵan soń, oılanbastan qalaǵa shyǵyp kettik. Qaraǵandyǵa jete bergende jolda polıtsııa qyzmetkerlerin kórdik. Men olardan bizdi aýrýhanaǵa jetkizýdi ótindim. Olar esh kidirmesten kelisip, bizge kómekke asyqty. Perınataldy ortalyqqa jetkizilgennen keıin de olar únemi qońyraý shalyp, áıelimniń jaǵdaıyn bilip otyrdy. Allaǵa shúkir, áıelim aman-esen bosandy. Biz polıtseılerge óte rızamyz. Olardyń erligi men kómegin atap ótkimiz keledi», - deıdi jas áke.
Áıel aman-esen ul týyp, polıtseılerge shynaıy alǵysyn jetkizdi.
