Qaraǵandy polıtseıleri taksı salonynan 20 keli geroın tapty
QARAǴANDY. QazAqparat - Qaraǵandy oblysynda «Mak» respýblıkalyq jedel-aldyn alý sharalary barysynda eki iri esirtki partııasy - geroın men gashısh tabyldy, dep habarlady óńirlik ІІD baspasóz qyzmetinen.
«5 qyrkúıekte QR ІІM esirtki bıznesimen kúres komıtetiniń qyzmetkerleri Qaraǵandy oblysynyń «Temirtaý-Osakarovka» avtojolyndaǵy áriptesterimen birlesip Temirtaýdan 3 shaqyrym jerden 45 jastaǵy er adam basqaryp kele jatqan «Nexia Ns 150» kóligin ustady. Mashına salonynda eki jolaýshy bolǵan. Tekserý barysynda júksalǵyshtan eki polıetılen paketke oralǵan aq tústi zat salynǵan jol sómkesi tabyldy», - delingen habarlamada.
Júrgizilgen saraptamaǵa sáıkes pakette jalpy salmaǵy 20 keliden asatyn geroın tabyldy.
«34 jasar taksı jolaýshysy ustalyp, tergeý oqshaýlaǵyshyna qamaldy. Oǵan qatysty QR QK 259-baby («Esirtki zattardy nemese psıhotroptyq zattardy zańsyz daıyndaý, óńdeý, ıemdenip alý, saqtaý, tasymaldaý, jóneltý nemese satý») boıynsha qylmystyq is qozǵaldy, tergeý júrgizilýde», - delingen habarlamada.
Vedomstvonyń baspasóz qyzmetiniń aqparatyna súıensek, osy kúni «Rýbej-Sokýr» statsıonarlyq kúzetinen oblystyq ІІD EKB qyzmetkerleri Jambyl oblysy Shý aýdanynyń 30 jastaǵy turǵynynyń chemodanynan oraýly jasyl tústi zat tapty. Saraptama onyń 14 keli gashısh ekenin anyqtady.
«Jolaýshy ýaqytsha ustaý oqshaýlaǵyshyna qamaldy. Oǵan qatysty qylmystyq is qozǵalyp, tergeý júrgizilýde. Er adam gashıshti Astanaǵa aparyp satpaqshy bolǵanyn moıyndady», - dep qosty oblystyń ІІD baspasóz qyzmetinen.
