Qaraǵandy polıtseıleri kópirden sekirmek bolǵan 19 jastaǵy boıjetkendi qutqardy
QARAǴANDY. QazAqparat - Qaraǵandylyq polıtseıler aspaly kópirden sekirmek bolǵan jas qyzdy qutqaryp qaldy, dep habarlaıdy Polisia.kz.
21 sáýir kúni keshkilik quramynda polıtsııa qyzmetkerleri Raýan Orazbekov, Aman Ábildá jáne Elýbaı Nasýrllaev bar avtopatrýl tótenshe jaǵdaı rejımin saqtaý sharalary boıynsha Buqar jyraý dańǵylynyń boıynda qyzmet atqaryp turǵan. Saǵat 21.40 shamasynda olardyń janyna ınkassator kóligi toqtap, kólik júrgizýshisi kópirdiń ústinen ótkenin jáne ol jerde bir adam kópirden sekirmek bolyp turǵanyn habarlaǵan.
Patrýldik jasaq qyzmetkerleri atalǵan oqıǵa boıynsha jedel basqarý ortalyǵyna habarlap, polıtseı Raýan Orazbekov avtokólikpen birden sol jaqqa baǵyt alsa, onyń áriptesteri Aman Ábildá men Elýbaı Nasýrllaev jaıaý adamnyń kópirdiń qaı betinde turǵanyn anyqtaýǵa kirisken. Polıtsııa qyzmetkerleriniń kóligin kórgen qyz olardyń qasyna jaqyndamaýyn talap etip, áıtpese tómenge sekiretinin aıtqan.
«Oqıǵa orynyna kelgenimizde azamatsha kópirdiń temirinen ustap, tómen qaraı sekirmek bolyp tur eken. Biz onyń ondaı áreketke barmaýyn ótindik. Degenmen ol aıtqan betinen qaıtpaıtynyn aıtyp, jylaýmen boldy. Onyń ómirin saqtap qalý maqsatynda áriptesim Elýbaı áńgimege tartyp, kóńilin aýlady. Men bolsam ony qalaıda aman alyp qalý úshin aqyryn janyna jaqyndadym. Bir sátte ol qolyn temirden alyp, sekirýge oqtalǵan sátte ustap qalýǵa múmkindigim bar ekenin sezgennen keıin onyń eki qolynan shap berip ustap aldym»,-deıdi polıtsııa leıtenanty Aman Ábildá.
Osydan keıin qos polıtseı qyz balany qaýipsiz jerge shyǵaryp, ne úshin mundaı qadamǵa barmaq bolǵanyn anyqtaýǵa tyrysqan. Biraq, jylaýdan basqa tártip saqshylaryna esh nárse aıtpaǵan 19 jastaǵy qyzdy jedel járdem qyzmetkerleri alyp ketken. Qazirgi tańda ol azamatshamen psıholog mamandar jumys istep jatyr.
