Qaraǵandy polıtseıleri kisi óltirgen qylmyskerdi jarty saǵatta izdep tapty
QARAǴANDY. QazAqparat - Búgin Qaraǵandy polıtseıleri kisi óltirý qylmysyn 30 mınýtta ashty, dep habarlaıdy «QazAqparat» HAA tilshisi.
«27 aqpan kúni Qaraǵandy oblysynyń barlyq ishki ister organdaryna tańǵy tórtte er adamnyń máıiti pyshaq jaraqatymen tabylǵany týraly habar taratyldy. Qylmyskerdi izdeýge qalanyń barlyq patýrldi ekıpajy men kınologııalyq qyzmeti jumyldyryldy», - dep mán-jaıdy baıandady óńirlik ІІD baspasóz qyzmeti.
Arnaıy úıretilgen ıt qylmyskerdiń ıisi arqyly izine tústi. Polıtsııa, óz kezeginde avtokólik shınalarynyń protektor izin anyqtady. Nátıjesinde polıtsııa qyzmetkerleri kisi óltirýge kúdiktiniń ornalasqan jerin tapty.
«Kisi óltirý qylmysynan 30 mınýt ótkende №1125 avtopatrýl qyzmetkerleri 22 jastaǵy Qaraǵandy turǵynyn ustady. Ol 27 jastaǵy zardap shegýshimen janjaldasyp qalǵanyn jáne ony óltirgenin moıyndady», - dep habarlady ІІD baspasóz qyzmeti.
Ustalǵan kúdiktiniń pyshaǵy tárkilendi. Ol ýaqytsha ustaý oqshaýlaǵyshyna qamaldy. QR QK 99-baby, 1-bólimi «Adam óltirý» boıynsha sotqa deıingi tergeý amaldary júrip jatyr.
