Qaraǵandy polıtseıleri demikpesi ustaǵan júk kóliginiń júrgizýshisin qutqaryp qaldy
QARAǴANDY. QazAqparat - Qaraǵandy oblystyq ishki ister departamenti jol-patrýldik polıtsııa batalony qyzmetkerleri úskirik aıaz kezinde tasjolda astmasy bastalǵan júk kóliginiń júrgizýshisine kómekke keldi, dep habarlaıdy «QazAqparat» HAA tilshisi.
Serjant Qýanysh Qajkerov pen leıtenant Danııar Kenjebekov Almaty-Ekaterınbýrg tasjolynda qyzmette júrgen. Temirtaýǵa jaqyn jerde polıtseıler joldyń boıynda turǵan júk kóligin baıqaıdy. Olar júrgizýshige kómek qajet pe dep suraý úshin barady.
«Solıarka qatyp qalyp, meniń astmam bastaldy, sol kezde poolıtsııa qyzmetkerleri keldi, - dep baıandady Andreı Karabanov. - Tańǵy saǵat 4 kezi edi, dala qatty aıaz, jel soǵyp, apattyq toqtaý belgisin ushyryp áketti. Polıtseıler meni óz kólikterine otyrǵyzyp, jedel járdem kelgenshe jylyndyrdy. Meniń alyp bara jatqan júgim óte qymbat boldy, dárigerler kelgenge deıin men medıkterdiń qyzmetinen bas tartyp otyrǵan edim. Polıtsııa qyzmetkerleri taýarlardyń saqtalýyn qamtamasyz etýge ýáde etkennen keıin, aýrýhanaǵa bardym».
Er adam aýrýhanada bolǵanda, polıtseıler júk kóligin jylytý beketine deıin súırep alyp barǵan.
«Men jolda burynnan jumys isteımin, ómir men ólimniń ne ekenin bilemin. Polıtsııa qyzmetkerlerin madaqtaǵandaryn qalaımyn. Kútpegen jerden kómekke kelgen polıtseılerge alǵysym sheksiz», - dedi júrgizýshi.
Tártip saqshylary óz áreketterin batyldyq dep eseptemeıdi.
«Bul bizdiń kúndelikti jumysymyz, biz kómekke muqtaj ár adamǵa qol ushyn berýge ázirmiz», - dedi polıtsııa leıtenanty Danııar Kenjebekov.
