Qaraǵandy polıtseıleri bir kúnde alaıaqtyq boıynsha alty qylmysty ashty
QARAǴANDY. QazAqparat – Qaraǵandy oblysynda «Kontrafakt» jedel-aldyn alý is-sharasy aıasynda bir kún ishinde alty qylmys ashyldy, olardyń jalpy shyǵyny 430 myń teńgeden asty, dep habarlaıdy QazAqparat tilshisi Qaraǵandy oblysy PD baspasóz qyzmetine silteme jasaı otyryp.
Jedel aldyn alý is-sharalaryn júrgizý kezinde Balqash qalasynda polıtseıler kontrafaktilik ónim daıyndaýmen aınalysqan 38 jastaǵy qala turǵynyn quryqtady.
Budan basqa tártip saqshylary buryn jasalǵan 5 qylmysty ashty.
2019 jyly 13 aqpanda Jezqazǵan qalasynyń polıtsııa basqarmasyna 37 jastaǵy qala turǵyny shaǵymdandy. Ol ózin fırma ókilimin dep tanystyrǵan bir áıel nesıesin óteımin dep aldap, 80 myń teńgeden astam qarajat alyp ketkenin málimdedi. Atalǵan is boıynsha polıtsııa qyzmetkerleri Almaty qalasynyń 23 jastaǵy turǵynyn anyqtady. Ol kinásin moıyndady.
Alaıaqtardyń taǵy bir qurbany, 52 jastaǵy qaraǵandylyq azamatsha 2020 jyldyń 9 qańtarynda Jańa Maıqudyq polıtsııa bólimine júgingen. Jábirlenýshiniń aıtýynsha, belgisiz áıel oǵan nesıe resimdeýdi usynyp, onyń 225 myń teńgesin urlap ketken. Jedel izdestirý is-sharasy barysynda Qaraǵandy qalasynyń 36 jastaǵy turǵyny anyqtaldy.
Osyǵan uqsas polıtsııa qyzmetkerleri Qaraǵandy qalasynyń Kırov sektorynda jáne Temirtaý qalasynyń Shyǵys sektorynda jasalǵan alaıaqtyq týraly taǵy 2 qylmysty ashty. Aldanǵan azamattar 2020 jyldyń 13 aqpanynda polıtsııaǵa júgingen.
Atalmysh faktiler boıynsha polıtsııa qyzmetkerleri «alaıaqtyq» baby boıynsha sotqa deıingi tergeý jumystaryn bastady.
