Qaraǵandy polıtseıleri asylyp ólmek bolǵan er adamdy qutqardy
QARAǴANDY. QazAqparat – Qaraǵandy qalasynyń tártip saqshylary er adamdy ólimnen qutqardy. Ol ózine qol jumsamaq bolǵan. Polıtseıler onyń moınyndaǵy jipti sheship úlgergen, dep habarlaıdy QazAqparat tilshisi.
9 qyrkúıekte Qaraǵandy qalasynyń PB patrýldik polıtsııa polkiniń Ashat Nurǵalıev, Baýyrjan Qurmanalıev jáne Ulan Muzaparov quramyndaǵy ınspektorlar jasaǵy qalanyń Kırov sektorynda qyzmet atqarǵan.
23.30 shamasynda jedel basqarý ortalyǵynan 22-shaǵynaýdandaǵy kópqabatty úıde otbasylyq janjal týyndaǵany týraly habarlama kelip tústi.
«Biz atalǵan mekenjaıǵa kelgende úıdiń kireberisinde bizdi bir áıel qarsy aldy. Qońyraý shalyp, polıtsııaǵa habar bergenin málimdedi. Áıeldiń aıtýynsha, onyń burynǵy kúıeýi óz-ózine qol jumsamaq bolǵan. WhatsApp jelisi arqyly er adam qoshtasý hatyn jazǵan jáne moınyndaǵy jippen ózin-ózi sýretke túsirip, úlken qyzyna joldaǵan. Áıel onyń naqty mekenjaıyn ataı almady, óıtkeni burynǵy kúıeýi jaldamaly páterde turady. Biraq ol úı men kireberisti kórsete aldy. Ol úı kórshi 21-shaǵynaýdanda ornalasqan», – deıdi Ashat Nurǵalıev.
Polıtseıler bul jaǵdaıda ár mınýt sanaýly ekenn jaqsy túsingen. Kóp uzamaı olar er adam jalǵa alǵan páterdiń janyna jetken.
Metall esikti qaqqanymen, olarǵa eshkim jaýap bermegen. Sodan keıin tártip saqshylary páterge tereze arqyly kirýdi uıǵardy.
«Áriptesim meni demep jiberdi de, men terezege shyqtym. Onyń fortochkasy ashyq boldy. Men oǵan kirip, as úıge óttim. Kireberis esikti ashyp, serigimmen birge páterdi teksere bastadyq. Jýynatyn bólmeniń esigin ashqanda er adamnyń edende moınyna oralǵan jippen otyrǵanyn kórdik», – deıdi Baýyrjan Qurmanalıev.
Patrýl qyzmetkerleri onyń ilmegin sheship, alǵashqy medıtsınalyq kómek kórsetken.
Er adam ózine kelgende sóılep, qozǵala aldy. Kelgen jedel járdem dárigerleri ony tekserip, ómirine qaýip joq ekenin aıtty.
Belgili bolǵandaı, er adam qıyn ómirlik jaǵdaıǵa tap bolǵan. Ol jaqynda áıelimen ajyrasyp, jumyssyz qalǵan.
Polıtseıler er adamdy týystarynyń qaraýyna berip, qyzmetin jalǵastyrdy.
