Qaraǵandy polıtseıleri altynshy qabattan sekirip ólmekshi bolǵan er adamdy qutqardy
12 tamyz kúni saǵat 15.00-de Qaraǵandy qalasy PB jedel basqarý ortalyǵyna Karbyshev kóshesindegi kópqabatty úıdiń páterinde er adamnyń janjal shyǵarǵany týraly habarlama kelip tústi.
Ratsııa boıynsha bul aqparat patrýldik polıtsııa polkiniń baǵyttardaǵy narıadtaryna kelip tústi. Oqıǵa ornyna birinshi bolyp quramynda Bolat Muhajanov pen Nurkeldi Áshirbek qyzmet ınspektorlary bolǵan patrýldik avtomobıl ekıpajy keldi.
«Úıdiń kireberisinde bizdi bir adam qarsy aldy. Polıtsııaǵa qońyraý shalǵan sol kisi ekeni belgili boldy. Polıtsııa shaqyrýyna 37 jastaǵy uly otbasynda janjal týdyrǵany sebep bolǵan eken. Er adam ulyna qatysty ótinish jazǵysy keletinin aıtty. Áńgime barysynda úıindegilermen janjaldasqan soń uly altynshy qabatta ornalasqan kireberistiń terezesinen sekirýge tyrysqanyn jetkizdi. Men kireberiske júgirdim, altynshy qabatqa kóterildim, ashyq terezeniń janynda turǵan er adamdy baıqadym. Jaı ǵana janyna taqalǵanymda, ol tómen sekiremin dep aıqaılaı bastady. Men ony qaterli qadam jasamaýǵa kóndire bastadym. Bul kezde seriktesim syrtta turyp, qaýipsizdik sharalaryn qoldana bastady. Oqıǵa ornyna áriptesim jedel járdem, órt sóndirýshilerdi shaqyrdy», - deıdi Bolat Muhajanov.
Er adammen kelissózder oń nátıje berdi. Polıtsııa qyzmetkerleri ony terezeden túsýge kóndirdi. Sodan keıin tártip saqshylary qutqarylǵan adamdy dárigerlerge tapsyrdy.