Qaraǵandy polıtseıleri 7 jasar qyzdy zorlamaq bolǵan kúdiktini izin sýytpaı ustady
QARAǴANDY. QazAqparat – Qaraǵandyda patrýl polıtsııa polkiniń qyzmetkerleri 7 jasar qyz balany zorlamaq bolǵan qylmyskerdi ustady, dep habarlaıdy QazAqparat tilshisi.
Instagram áleýmettik jelisinde qala turǵyny Qaraǵandy qalasy ІІB patrýl polıtsııa polkiniń qyzmetkerlerine alǵys aıtty.
«Qaraǵandy qalasy ІІB patrýl polıtsııa qyzmetkerlerine, atap aıtqanda Myrzabekov Darhan Sársenhanuly men Arǵyn Aqnıet Bolatulyna jedel áreket etkeni úshin alǵys aıtqymyz keledi. Senbi, 7 jeltoqsan kúni belgisiz er adam úıdiń kireberisinde 7 jasar qyz balaǵa tıisip, sol týraly shaǵym aıtyp polıtsııaǵa habarlastyq. Jigitter qońyraý shalǵan soń 2 mınýt ishinde kelip jetti. Sodan keıin olar bala jáne onyń ata-anasynyń bireýimen jaqyn mańdy aralaýǵa kiristi. Tártip saqshylary kásibı jáne jedel áreket etti. Osynyń arqasynda bala er adamdy top arasynan tanyp, anyqtady. Taǵy birer mınýt keshikse, qylmysker izin jasyryp keter edi. Qylmys jasamaq bolǵan er adam qamaýǵa alyndy. Onyń nıeti buzyq bolǵany aıdan anyq»,- deıdi qala turǵyny.
7 jeltoqsan kúni saǵat 10:30 shamasynda 102 telefonyna qala turǵynynan belgisiz er adamnyń 7 jasar qyzdy zorlamaq bolǵany týraly habarlama kelip tústi. Oqıǵa ornyna dereý polıtsııa jasaǵy jiberildi, olar kúdiktini tabý úshin jaqyn aýdandardy tinte bastady. Jedel-izdestirý barysynda patrýl polıtseıleri 43 jastaǵy er adamdy ustady.
Aıta ketý kerek, bul - onyń alǵashqy qylmysy emes. 2006 jyly ol osyǵan uqsas 12 qylmys jasaǵany úshin 15 jylǵa sottalǵan. 2019 jyldyń naýryzynda ol merziminen buryn shartty túrde bosap shyqqan.
Qazirgi ýaqytta QR QK 24-120-baby 4-bóligi boıynsha sotqa deıingi tergeý bastaldy. Ustalǵan azamat qamaýǵa alyndy.
