Qaraǵandy polıtseıleri 100-den astam kólikti qar qursaýynan shyǵardy
QARAǴANDY. QazAqparat - Qaraǵandy oblysynda polıtsııa qyzmetkerleri 114 kólikti qar qursaýynan shyǵardy. Sondaı-aq tártip saqshylary jylytý beketterine 29 adamdy jetkizdi, dep habarlaıdy QazAqparat tilshisi.
23 qańtarda aýa raıynyń qolaısyzdyǵyna baılanysty Qaraǵandy oblysy polıtsııa departamentiniń qyzmetkerleri 114 kólikti qar qursaýynan shyǵardy. Budan basqa polıtseıler 29 adamdy qutqaryp, olardy jylytý oryndaryna jetkizdi. Oblystyń joldarynda 27 beket qoıylyp, 113 qyzmetker jumyldyrylǵan.
Tártip saqshylary júrgizýshilerdi mindetti túrde qaýipsiz jyldamdyq rejimin saqtaýdy jáne avtomobılder arasyndaǵy qashyqtyq pen búıirlik aralyqty saqtaýdy, jolda manevr jasaý kezinde uqypty bolýdy suraıdy.
«Joldyń kórinýiniń nasharlaýyna jáne kóktaıǵaqqa baılanysty alys sapardan bas tartý kerek. Eger tótenshe jaǵdaıǵa tap bolsańyzdar, 102 nómirine qońyraý shalyńyz», - dep atap ótti Temirtaý qalalyq ІІB patrýldik polıtsııa batalony komandıriniń orynbasary Áset Bulanbaev.
Tártip saqshylarynyń eskertýlerine jáne sınoptıkterdiń boljamyna qaramastan kóptegen júrgizýshiler alys jolǵa shyǵýyn toqtatar emes. Solardyń biri Saran qalasynyń turǵyny. Ol elordaǵa attanǵan. Biraz ýaqyttan keıin Batpaq aýylynyń mańynda kóligi synyp, oǵan eshkim toqtamaǵan. Sol mańda polıtsııa qyzmetkerleri ótip bara jatyp, qıyndyqqa tap bolǵan júrgizýshige qolushyn sozǵan.
«Meniń kóligimniń qozǵaltqyshy buzyldy. Eshkim toqtaǵan joq, qatyp qalamyn dep oıladym. Alaıda biraz ýaqyttan soń jol polıtsııasynyń avtokóligi kelip jetti. Olar qandaı kómek kerek ekenin surady, kólikterine meni otyrǵyzyp, Osakarovka aýylyna apardy, onda men kóligime qajetti bólshekterdi satyp aldym. Sonan soń qaıta alyp kelip, mashınamdy jóndep alǵansha kútti. Jigitterge kóp rahmet», - dep polıtsııa qyzmetkerlerine Instagram-da er adam alǵys bildirdi.
Áleýmettik jelilerde jáne WhatsApp messendjeri arqyly júrgizýshiler polıtseıler qoldaryna kúrek alyp, qar qursaýynda qalyp qoıǵan kólikterdi qalaı alyp shyǵyp jatqany túsirilgen beınerolıkterdi taratýda.
Óz kezeginde polıtseıler júrgizýshilerdi eldi mekennen tys jerge barýdan bas tartýdy suraıdy.
Qazirgi ýaqytta polıtsııa qyzmetkerleri mashınalar kolonnalaryn baratyn jerine deıin ertip alyp júredi. Júk avtokólikteriniń júrgizýshilerin ystyq tamaqpen qamtamasyz etedi.
