Qaraǵandy perzenthanasynda sábılerdi reanımatsııalaýǵa arnalǵan zamanaýı apparat ornatyldy

QARAǴANDY. QazAqparat – AYALA qaıyrymdylyq qory Qaraǵandy oblystyq klınıkalyq aýrýhanasyna terapııalyq gıpotermııa jáne elektroentsefalografııa apparattaryn tapsyrdy. Bul jabdyq bosaný kezinde asfıksııanyń aýyr túrlerinen týyndaǵan nárestelerdiń ólimin azaıtýǵa kómektesedi.

AYALA QQ zamanaýı reanımatsııalyq jabdyqty satyp alýda bas seriktesi Samruk-Kazyna Trust áleýmettik jobalardy damytý qory boldy.

«Joba aıasynda elektroentsefalografııa monıtory jáne avtomatty basqarylatyn gıpotermııa apparaty, sondaı-aq patsıent monıtory satyp alyndy. Osynyń barlyǵy náresteler óliminiń deńgeıin tómendetýge, sondaı-aq jańa týǵan nárestelerde asqynǵan asfıksııa nátıjesinde múgedektiktiń aýyr túrleriniń damýyn boldyrmaýǵa múmkindik beredi», – deıdi Samruk Kazyna Trust áleýmettik jobalardy damytý qorynyń resmı ókili Mıras Іrgebaev.

Jyl saıyn Qaraǵandy oblysynda 19 myń bala dúnıege keledi, onyń ishinde merziminen buryn týatyndar – shamamen 7%.

Olarǵa negizgi kómekti alty perınataldyq ortalyq kórsetedi.

Onyń biri klınıkalyq aýrýhana bazasynda jumys isteıdi jáne jyl saıyn 5 myńǵa jýyq bosanýdy qabyldaıdy.

Ótken jyly munda ortasha jáne aýyr dárejeli asfıksııamen 100-ge jýyq náreste dúnıege keldi. Onyń barlyǵy terapevtik gıpotermııany qajet etti.

Alaıda aýrýhanada bul úshin arnaıy jabdyq bolǵan joq, sondyqtan ony ımprovızatsııalanǵan quraldarmen jasady.

Terapııalyq gıpotermııany jańa týǵan náresteniń ómiriniń alǵashqy 6 saǵatynda nemese tipti alǵashqy mınýttarynda qoldaný kerek.

Sodan keıin mı jasýshalarynyń jumysyn qalpyna keltirýge múmkindik bolady.

Eger mundaı apparat aýrýhanada bolmasa, onda balanyń ortalyq júıke júıesiniń aýyr fýnktsıonaldy zaqymdalý yqtımaldyǵy joǵarylaıdy, al kúrdeli jaǵdaıda sábı shetinep ketýi múmkin.

«Sońǵy bes jylda biz perınataldyq ortalyqtardy avtomatty basqarylatyn gıpotermııaǵa arnalǵan jabdyqpen jaraqtandyrý boıynsha belsendi jumys istep kelemiz. Іri demeýshilerdiń qoldaýymen biz Nur-Sultan qalasynyń Ana men bala ulttyq ǵylymı ortalyǵynda, Almatydaǵy perınatologııa jáne balalar kardıohırýrgııasy ortalyǵynda, Atyraý, Túrkistan, Semeı oblystyq perınataldyq ortalyqtarynda osyndaı apparattyq keshender ornattyq. Biz bul jabdyqty Qaraǵandy aýrýhanasyna jetkizgenimizge óte qýanyshtymyz jáne «Basqarylatyn gıpotermııa« jobasynyń bas seriktesi – Samruk-Kazyna Trust áleýmettik jobalardy damytý qory kishkentaı qaraǵandylyqtardyń ómiri men aqyl-parasatyn saqtap qalýǵa kómekteskeni úshin alǵys aıtamyz», – dep atap ótti AYALA qaıyrymdylyq qorynyń prezıdenti Aıdan Súleımenova.