Qaraǵandy ortalyq saıabaǵyndaǵy kól sýynyń quramynda zııandy zattar joq - ekologtar
QARAǴANDY. QazAqparat – Qaraǵandy qalasynyń ortalyq saıabaǵyndaǵy kólge quıylǵan sýdyń quramynda lastaıtyn zattar tabylǵan joq. Ekologtar zerthanalyq zertteýlerden keıin osyndaı qorytyndy jasady, dep habarlaıdy QazAqparat tilshisi.
Ortalyq saıabaq kóline sý jiberý faktisi boıynsha, 27 qazanda Ekologııa departamentiniń mamandary sý jiberilgen oryndy qarap shyqty. Tekserý barysynda kólge dıametri 800 mm polıpropılen qubyrynan saz aralas sý aǵyzylyp jatqany anyqtaldy, sondaı-aq ortalyq saıabaqqa kireberiste Jaýynger-ınternatsıonalıster kóshesi boıyndaǵy jol jıeginde qubyrlar aýystyrylǵany belgili boldy.
«Qaraǵandy Sý» JShS habarlaǵandaı, 27 qazannan bastap qubyrlardy syǵymdaý, jýý boıynsha tehnologııalyq is-sharalar júrgizilýde. Bul sý taratqyshtyń jańa jelisin paıdalanýǵa berý kezinde oryndalatyn mindetti shara.
«Zerthana-saraptamalyq baqylaý bólimi sý synamalaryn aldy. Zertteý júrgizý kezinde nátıjeler sý aıdyndaryna zııandy bolyp tabylatyn mádenı-turmystyq maqsattaǵy lastaýshy zattardyń shekti ruqsat etilgen kontsentratsııasymen salystyryldy. Alynǵan nátıjeler aǵyzylatyn sýdyń quramynda sharýashylyq-turmystyq lastaný belgileriniń joq ekenin kórsetti», - dep habarlady Qaraǵandy oblysynyń ekologııa departamentiniń ókilderi.
Esterińizge sala keteıik, qaraǵandylyqtar áleýmettik jelilerde jarııalanǵan vıdeoǵa qatysty narazylyqtaryn bildirgen bolatyn. Beınede Ortalyq saıabaqtyń kóline las sýdyń aǵyzylyp jatqanyn kórýge bolady. Qala bıligi bul sý jańa magıstraldiń qubyrlaryn jýǵannan keıin aǵyzylǵan taza sý ekenin aıtyp, turǵyndardy sabyrlyqqa shaqyrdy.
