Qaraǵandy ooblysynda jalǵan antıseptıkter tárkilendi
QARAǴANDY. QazAqparat - Qaraǵandy oblysynyń kommertsııalyq kásiporyndarynyń biriniń basshysy ruqsat qujatysyz antıseptık jasap, satqan. Kásiporyn qoımasynan úsh tonnadan astam zararsyzdandyrý quraly tárkilendi, dep habarlaıdy QazAqparat tilshisi.
QR QM Qarjy monıtorıngi komıtetiniń Qaraǵandy oblysy boıynsha Ekonomıkalyq tergeý departamenti 2 sáýirde jalǵan antıseptıkalyq preparatty daıyndaý jáne ótkizý faktisiniń jolyn kesti.
Elde jarııalanǵan tótenshe jaǵdaı kezinde Qaraǵandydaǵy kommertsııalyq kásiporyndarynyń biriniń basshysy tıisti ruqsat berý qujattarynsyz antıseptıkalyq qural jasap, satqan. Atalmysh kásiporyn buryn lak-boıaý ónimderin daıyndaýmen aınalysqan.
«Júrgizilgen jedel-izdestirý is-sharalarynyń nátıjesinde quramynda belgilenbegen antıseptıkalyq zattardy óndirý jáne ydystarǵa quıý jónindegi jabdyqtary bar tseh anyqtaldy. Úsh tonnadan astam daıyndalǵan antıseptıka lıtrine 3 000 teńge baǵasymen satylǵan. Sondaı-aq kásiporynnan 40 lıtr tehnıkalyq spırt tárkilendi. QR QK 214 baby boıynsha sotqa deıingi tergeý bastaldy (sanktsııa múlikti tárkileýmen 5 jylǵa deıin bas bostandyǵynan aıyrýdy qarastyrady), Daıyndalǵan jáne satylǵan ónimniń barlyq kólemin anyqtaý boıynsha jedel-tergeý sharalary júrgizilýde», - dep habarlady Qaraǵandy oblysy boıynsha Ekonomıkalyq tergeý departamentinde.
