Qaraǵandy, Ońtústik Qazaqstan, Aqtóbe ýnıversıtetterine ulttyq mártebe berilmeıdi
NUR-SULTAN. QazAqparat – QR Premer-Mınıstri Álıhan Smaıylov Májilis depýtattarynyń E.Bóketov atyndaǵy Qaraǵandy ýnıversıtetine, M. Áýezov atyndaǵy Ońtústik Qazaqstan ýnıversıtetine, Q.Jubanov atyndaǵy Aqtóbe óńirlik ýnıversıtetine ulttyq ýnıversıtet mártebesin berýge qatysty saýalyna jaýap berdi, dep habarlaıdy QazAqparat tilshisi.
«Zańnamaǵa sáıkes jeke tulǵany tárbıeleýde, oqytýda jáne kásibı qalyptastyrýda, joǵary jáne (nemese) joǵary oqý ornynan keıingi bilim berýdiń turaqty joǵary deńgeıin qamtamasyz etýde oqý ornynyń úzdik jetistikteri úshin erekshe mártebe beriledi. Búgingi tańda ulttyq ýnıversıtet mártebesi 11 joǵary jáne (nemese) joǵary oqý ornynan keıingi bilim berý uıymdaryna (L. N. Gýmılev atyndaǵy Eýrazııa ulttyq ýnıversıteti, Ál-Farabı atyndaǵy Qazaq ulttyq ýnıversıteti, Abaı atyndaǵy Qazaq ulttyq pedagogıkalyq ýnıversıteti, Qazaq ulttyq qyzdar pedagogıkalyq ýnıversıteti, Q.I. Sátbaev atyndaǵy Qazaq ulttyq tehnıkalyq zertteý ýnıversıteti, S.D. Asfendııarov atyndaǵy Qazaq ulttyq medıtsına ýnıversıteti, Qazaq ulttyq agrarlyq ýnıversıteti, Qazaq ulttyq óner ýnıversıteti, T.Q. Júrgenov atyndaǵy Qazaq ulttyq óner akademııasy, Qurmanǵazy atyndaǵy Qazaq ulttyq konservatorııasy, Qazaq ulttyq horeografııa akademııasy) berilgen. Atalǵan tizbe daıarlyqtyń barlyq baǵyttaryn, atap aıtqanda, pedagogıkalyq bilim berýdi, jaratylystaný ǵylymdaryn, medıtsınany, aýyl sharýashylyǵyn qamtıdy. Sondaı-aq Qazaqstan Respýblıkasynyń Ǵylym jáne joǵary bilim mınıstrligi M. Áýezov atyndaǵy Ońtústik Qazaqstan ýnıversıtetine zertteý ýnıversıteti mártebesin berý máselesin pysyqtaýda», - dedi Úkimet basshysy jaýabynda.
Onyń atap ótýinshe, «Bilim týraly» Zańnyń 52-babynyń 5-tarmaǵyna sáıkes erekshe mártebesi bar joǵary jáne (nemese) joǵary oqý ornynan keıingi bilim berý uıymdarynyń professorlyq-oqytýshylyq quramynyń jáne basshy qyzmetkerleriniń laýazymdyq aılyqaqylary basqa joǵary jáne (nemese) joǵary oqý ornynan keıingi bilim berý uıymdaryna qaraǵanda edáýir joǵary. Óıtkeni olar joǵary koeffıtsıentti eskere otyryp aıqyndalady.
«Erekshe mártebesi bar joǵary jáne (nemese) joǵary oqý ornynan keıingi bilim berý uıymdarynyń professorlyq-oqytýshylyq quramynyń eńbegine aqy tóleý basqa memlekettik joǵary jáne (nemese) joǵary oqý ornynan keıingi bilim berý uıymdaryna qaraǵanda 76,3 myń teńgege artyq, bul memlekettik bıýdjetten qosymsha shyǵystardy talap etedi. Sonymen qatar «Bilimdi ult» sapaly bilim berý» ulttyq jobasy aıasynda básekege qabiletti 20 joǵary jáne (nemese) joǵary oqý ornynan keıingi bilim berý uıymdarynyń, onyń ishinde 15 óńirlik joǵary jáne (nemese) joǵary oqý ornynan keıingi bilim berý uıymdarynyń 2025 jylǵa deıin olardyń bazasynda akademııalyq artyqshylyq ortalyqtaryn qurý boıynsha qoldaý jumystary bastalǵanyn atap ótý qajet», - dedi Álıhan Smaıylov.
Premer-Mınıstrdiń aıtýynsha, joba joǵary jáne (nemese) joǵary oqý ornynan keıingi bilim berý uıymdarynyń básekege qabilettiligin arttyrýǵa, oqý jáne ǵylymı zerthanalar qurý arqyly ýnıversıtetterdiń zertteý jáne ınnovatsııalyq ekojúıesin qalyptastyrýǵa baǵyttalǵan. Atalǵan jobany iske asyrý kórsetilgen joǵary jáne (nemese) joǵary oqý ornynan keıingi bilim berý uıymdarynda da kózdeletin bolady.
«Sonymen qatar qazirgi ýaqytta óńirlik joǵary oqý oryndary joǵary jáne (nemese) joǵary oqý ornynan keıingi bilim berý uıymdarymen, alys jáne jaqyn shet elderdiń uıymdarymen jáne ǵylymı-zertteý ınstıtýttarymen kelisimder, sharttar, memorandýmdar sheńberinde halyqaralyq yntymaqtastyqty kúsheıtýde, sondaı-aq bilim alýshylar men professorlyq oqytýshylyq quramynyń akademııalyq utqyrlyǵy, sheteldik ǵalymdar men mamandardy oqytýshylyq jáne ǵylymı qyzmetke tartý jáne t.b. boıynsha strategııalyq seriktestermen yntymaqtastyq damýda. Osylaısha, Qazaqstan Respýblıkasynyń Úkimeti óńirlik joǵary jáne (nemese) joǵary oqý ornynan keıingi bilim berý uıymdaryn qoldaý jáne damytý jóninde sharalar qabyldaýda. 3 Baıandalǵannyń negizinde, sondaı-aq óńirlik joǵary jáne (nemese) joǵary oqý ornynan keıingi bilim berý uıymdaryn qoldanystaǵy memlekettik qoldaý sheńberinde úsh joǵary jáne (nemese) joǵary oqý ornynan keıingi bilim berý uıymdaryna ulttyq ýnıversıtet mártebesin berýge erte dep sanaımyz», - dedi ol.
