Qaraǵandy onlaın-marafonyna myńnan astam qatysýshy jınaldy
QARAǴANDY. QazAqparat - Koronavırýstyq ınfektsııa pandemııasyna baılanysty Qaragandy Marathon 2020 sport merekesi onlaın formatta uıymdastyryldy. Biraq bul áýesqoı júgirýshilerdi toqtata almady, dep habarlaıdy QazAqparat tilshisi.
Onlaın-jarysqa 8 jastan 62 jasqa deıingi 1 150 qatysýshy tirkeldi. Olar Qazaqstannyń túkpir-túkpirinen, sondaı-aq Reseı, Mońǵolııa, Polsha, Qyrǵyzstannyń júgirýshileri.
Barlyq sportshylar búgin, 10 qazan kúni, 06.00-den 22.00-ge deıingi aralyqta óz aımaǵyndaǵy qashyqtyqty eńseredi. Olar ózderine yńǵaıly ýaqytty tańdaıdy jáne kópshilikpen tyǵyz baılanysqa túspeıdi.
Halyqaralyq onlaın-marafonnyń bastalýy dástúrge saı Qaraǵandynyń Ortalyq saıabaǵynda berildi. Qar men sýyq jelge qaramastan, munda biraz júgirýshiler jınaldy. Keıbireýler balalarmen birge keldi.
Ashylý saltanatyna Qaraǵandy oblysy jeńil atletıka federatsııasynyń prezıdenti, oblys ákiminiń orynbasary Álisher Ábdiqadyrov, dene shynyqtyrý jáne sport basqarmasynyń basshysy Temirhan Abylaev jáne QR jeńil atletıkadan bas jattyqtyrýshysy Dmıtrıı Karpov qatysty.
«Adamdardyń osyndaı is - sharalardy saǵynǵany kórinip tur, - deıdi Álisher Ábdiqadyrov. - Standartty marafon ótkizýge múmkin bolmaǵandyqtan, ony nelikten onlaın uıymdastyrmasqa. Biz eshqandaı sanıtarlyq talaptardy buzbaımyz, barlyǵy erejelerge sáıkes keledi. Karantındik shekteýler jalǵasýda, biraq jattyǵýdy toqtatpańyzdar».
Ol barlyq qatysýshylarǵa sáttilik tiledi.
Jarys baǵdarlamasyna bes qashyqtyq kirdi – úsh shaqyrymnan bastap klassıkalyq marafon - 42 shaqyrym 195 metrge deıin.
«Eń tanymal qashyqtyq 10 shaqyrym boldy. Biraq 42 shaqyrymǵa júgirýdi sheshken batyl adamdar da bar. Olardyń sany 55 adam», - dep habarlady Qaraǵandy oblysy jeńil atletıka federatsııasynyń vıtse-prezıdenti Sergeı Zasımovıch.
Bıyl alǵash ret 3 shaqyrymdyq otbasylyq qashyqtyq paıda boldy.
«Búgin men 9 jasar ulym Leonıdpen jáne 5 jasar qyzym Pelageıamen júgiremin, - dep bólisti marafonǵa qatysýshy Tatıana Krasnova. – Biz otbasylyq qashyqtyqqa júgiremiz. Eń bastysy - ózińdi jeńý. Biz salaýatty ómir saltyn qoldaımyz!»
Júgirý aıaqtalǵannan keıin qatysýshylar Qaragandy Marathon 2020 platformasyna ýaqytty júkteý arqyly júgirý trekınginiń skrınshotyn jiberýi tıis. Jalǵan kórsetkishterge jol bermeý úshin barlyq nátıjelerdi Qaraǵandy oblysynyń jattyqtyrýshylar komandasy qadaǵalaıdy.
Nátıjeler kelesi aptada jarııalanady. Barlyq qatysýshylarǵa sertıfıkattar beriledi. Jeńimpazdarǵa marapattar jiberiledi.
