Qaraǵandy óńiriniń ShOB nysandary tótenshe jaǵdaıǵa beıimdele bastady
QARAǴANDY. QazAqparat – Qaraǵandy kásiporyndary bıznes úshin qıyn kezeńder bastalǵaly qyzmettiń jańa túrlerine kóship jatyr. Kásipkerler TJ rejıminde shekteýlerge beıimdelýde jáne jumys oryndaryn saqtaýǵa tyrysýda, dep habarlaıdy QazAqparat tilshisi.
Jańa tásilderdiń biri – beıindi ózgertý. Osyndaı ózgeriske «Qazaqstandyq ónerkásipti qoldaý ınstıtýty» JShS de bet burdy. Kásiporyn osyǵan deıin hımııalyq-ekologııalyq zertteýlermen aınalysyp, tabıǵatty qorǵaý jobalaý jáne normalaý qyzmetterin kórsetip kelgen bolatyn. Al endi zararsyzdandyrý qyzmetin kórsetýge kóshti. Ol úshin qajetti jabdyqtar men materıaldar satyp alyp, qyzmetkerlerdi oqytqan.
Instıtýttyń iri ónerkásiptik kásiporyndar sekildi klıentterin de jınap úlgerdi.
«Jumystardyń tolyq tsıklin engizgennen keıin qala aýmaǵyn sanıtarlyq óńdeýge óz kómegimizdi usynýǵa daıynbyz», - dep josparlarymen bólisti «Qazaqstandyq ónerkásipti qoldaý ınstıtýty» JShS dırektory Ernar Muhanǵalıev.
Jumys kıimine mamandanǵan tigin fabrıkalary kóp ret qoldanylatyn maskalar óndirisin jolǵa qoıdy. Osylaısha olar eki máseleni birdeı sheshken. Sheberler de qol qýsyryp qalǵan joq, atalmysh ónimniń tapshylyǵyn joıýda.
«Maskalar negizgi tapsyrystarmen qatar jasalady. Kúndelikti kólemi - 6000-7000 dana. Ónimdi tigý úshin biz dáke, shyt jáne bóz matalaryn – bir sózben aıtqanda, 100% maqta matalaryn qoldanamyz, ol ónimdi jýýǵa jáne útikteýge bolady. Biraq bizdiń negizgi ónimimizdiń túrleri – tósek jabdyqtary, kúndelikti jáne arnaıy kıim. Qazir jańa modelderdi oılastyrýǵa ýaqyt bar. Mamandar balyqshylar men ańshylarǵa arnalǵan kúrteshe dızaınymen jumys isteıdi. Mektep formasynyń jańa úlgilerin daıyndap, shaǵyn synaq partııasyn iske qostyq», - dedi Abaı tigin fabrıkasynyń jetekshisi Irına Malıýk.
Tyǵyryqtan shyǵar taǵy bir jol – onlaın qyzmetke ótý. Mundaı jumys túrin kóptegen adamdar qoldana bastady.
«Bizdiń óner mektebimiz Qaraǵandyda toǵyz jyl jumys isteıdi. Ótken jyly onlaın-oqytýdy engizdi. Al TJ tártibi jarııalanǵannan keıin sabaqty toqtatpadyq jáne qashyqtan ótkizip jatyrmyz. Tabysty joǵaltqan joqpyz. Óz tájirıbem boıynsha: onlaın sabaq ótkizý qıyn emes, bul úshin platformalar jetkilikti, eń bastysy - nátıje bolýy tıis», - deıdi kórkemsýret mektebiniń dırektory Dáýren Qoshen.
Kásipkerler jańa ıdeıalardy da engizýde. «Bıznes-Keńesshi» kýrsyn tyńdaýshy Roman Saımon 3D-prınterde basyp shyǵarylatyn kóp ret koldanylatyn plastıkten jasalǵan maskalar jasap shyǵaryp jatyr. Internette úsh ólshemdi modelder bazasyn qarap otyryp, ol cheh dızaınerleriniń qyzyqty jáne óte qarapaıym jobasyn kórgen. Sony júzege asyrýda endi.
