Qaraǵandy óńirinde 3 qyrkúıekte kúzgi ań aýlaý maýsymy bastalady

QARAǴANDY. QazAqparat – Qaraǵandy oblysynyń bekitilgen ańshylyq alqaptarynda jabaıy ańdardy aýlaýdyń kúzgi maýsymy 3 qyrkúıekten bastalady. Mamandar qandaı janýardy qaı kezeńde aýlaýǵa bolatynyn túsindirdi, dep habarlaıdy QazAqparat tilshisi.

Oblystyq tabıǵı resýrstar jáne tabıǵat paıdalanýdy retteý basqarmasynan málim etkendeı, qyrkúıektiń birinshi senbisi, ıaǵnı 3-inen bastap 15 jeltoqsanǵa deıin qaz, úırek pen qasqaldaqty aýlaýǵa bolady. Al, shildi 30 qarashaǵa deıin, qabandy 31 jeltoqsanǵa deıin aýlaýǵa ruqsat.

Qara torǵaıdy 15 qyrkúıekten 30 qarashaǵa deıin aýlaýǵa bolady.

Borsyqty 1 qyrkúıekten 15 jeltoqsanǵa deıin ońtústik aımaq boıynsha, 1 qyrkúıekten 15 qarashaǵa deıin soltústik aımaq boıynsha aýlaýǵa ruqsat beriledi.

Qoıan (aq qoıan, qońyr qoıan), qarsaq pen túlkini aýlaýǵa 1 qarashadan 15 aqpanǵa deıin shyǵýǵa bolady.

Aıta ketsek, sýyrdy aýlaý merzimi 5 maýsymnan bastap ońtústik aımaqta jaıǵasqanǵa deıin, 15 maýsymnan bastap soltústik aımaqta jaıǵasqanǵa deıin belgilengen.

Al, Sibir eligin aýlaýǵa 15 shildeden bastap ruqsat bar, biraq onyń urǵashysy men tólin 15 qyrkúıekten 31 jeltoqsanǵa deıin ǵana aýlaýǵa bolady.

«Sibir eligin aýlaý tıisti ańshylyq sharýashylyǵy sýbektisi qoryqshysynyń qatysýymen jáne ań aýlaýdyń belgilengen erejelerine sáıkes júrgiziledi. Erekshe qorǵalatyn tabıǵı aýmaqtarda, Qaraǵandy oblysynyń memlekettik qoryqshasy, tabıǵı rezervaty, ańshylyq alqaptarynyń rezervtik qory aýmaqtarynda ań aýlaýǵa tyıym salynady», - dep habarlady basqarmadan.

Foto: park-meshera.ru