Qaraǵandy ólketaný murajaıyna arheologııalyq oljalar tapsyryldy

QARAǴANDY. QazAqparat – Qaraǵandy oblystyq tarıhı-ólketaný murajaıynyń qory arheologııalyq oljalarmen tolyqtyryldy. Murajaıǵa barlyǵy 400-den astam jádiger tapsyryldy, olardyń basym bóligi Aqkezen jáne Abylaı eldi mekenderinen, dep habarlaıdy QazAqparat tilshisi.

«Barlyq jádigerler Taldy arheologııalyq qoryǵynan alynǵan. Bizdiń oljalarymyz negizinen qola dáýirine jatady. Olardyń ishinde bilezikter, pasta monshaqtary, qola monshaqtar, tutas alqalar, moıyntumarlar túrindegi áıelder áshekeıleri, sondaı-aq arnaıy japsyrmalardyń kómegimen jaq-bet alqasyna biriktirilgen qola jaldar jáne aıylbastar bar. Ádette mundaı moıyntumarlar toǵyz dóńgelek qola aıylbastardan turady, ortasynda úlkeniregi ornalastyrylady, barlyǵy birdeı oıý-órnektermen bezendirilgen. Bular murajaı qoryna tapsyryldy, bolashaqta kórmelerden kórýge bolady», — deıdi Saryarqa arheologııalyq ınstıtýtynyń jetekshi ǵylymı qyzmetkeri Igor Kýkýshkın.

2020 jylǵy dalalyq maýsymdaǵy oljalar murajaı qoryna E. A. Bóketov atyndaǵy QarÝ tarıh fakýltetiniń arheologtarynyń, Saryarqa arheologııalyq ınstıtýtynyń ǵalymdary men mamandary, «Arheologııalyq zertteýler» JShS jáne t. b. qatysýymen ótken baspasóz máslıhatynda berildi.

Aıta ketken jón, mundaı kezdesýler jyl saıyn ótkiziledi. Onda arheologtar atqarylǵan jumystar týraly esep beredi.