Qaraǵandy oqýshylary balalarǵa arnalǵan qol protezin jasap shyǵardy
ASTANA. QazAqparat - Qazaq-túrik lıtseıiniń onynshy synyp oqýshylary Qaısar Qýanysh pen Álisher Smaǵulov balalarǵa arnalǵan qol protezin jasap shyǵardy, dep habarlaıdy karaganda-region.gov.kz.
Ideıa avtory fızıka pániniń muǵalimi Altynbek Qaıyrbatyrov. Ol Qaraǵandydaǵy lıtseıde jaqynda jumysqa ornalasqan, buryn Pavlodarda fızıka páninen sabaq bergen.
«Protez týraly ıdeıa maǵan Qaraǵandyǵa aýyspaı turyp keldi, - dep eske aldy ol.
«Lıtseıdiń Pavlodardaǵy bólimshesinde 3D-prınter boldy, alǵashqy protezdi sol jerde jasadyq. Saýsaqsyz týylǵan Sashaǵa syıladyq. Qazir ol velosıped minip júr, balanyń ómiri jeńildedi. Meni Qaraǵandyǵa aýystyrǵanda bul isti osynda jalǵastyrýdy sheshtim. 3D-prınter satyp alyp, oqýshylarmen birge protezder jasap jatyrmyz. Protezdi jasap shyǵarý ońaı - oqýshylar birinshi úsh ólshemdi modeldiń barlyq tetigin salyp alyp, ony basyp shyǵarady jáne jınaıdy. Biz protezderdi endi jasap shyǵaryp jatqanymyzda, ol tek AQSh-ta óndiriletin. Olar bes myń dollar turatyn. Bizdiń protezder nebári 600 teńgeni quraıdy. Tek materıalǵa qarjy jumsadyq», - deıdi muǵalim. 
Qazir muǵalim QTL dırektsııasyna lıtseıdiń ár qaladaǵy bólimshesinde osyndaı protezderdi jasaý týraly hat jazýdy josparlap otyr. Daıyn protezderdi balalarǵa syılaýdy usynýda.
