Qaraǵandy oblysynyń joldarynda 23 adam qutqaryldy
QARAǴANDY. QazAqparat - Qaraǵandy oblysy tótenshe jaǵdaı departamentiniń bólimsheleri apattyq-qutqarý jumystaryn júrgizýde, dep habarlaıdy QazAqparat tilshisi.
15 qańtarǵa qaraǵan túni Osakarov aýdanyndaǵy Rýsskaıa Ivanovka aýylynan 4 shaqyrym jerde qutqarýshylar qar qursaýynan 3 adamdy Temirtaý qalasyna evakýatsııalady. Sonymen qatar, «Osakarovka-Nura» avtojolynyń 5-shi shaqyrymynda turyp qalǵan jeńil avtokólikten 6 adam qutqaryldy, onyń ishinde 2 bala Osakarovka kentine jetkizildi.
Buqar jyraý aýdanyndaǵy Úshtóbe aýylynyń aınalma jolynda 3 adam mingen jeńil avtokólik qar qursaýynan shyǵaryldy.
Sondaı-aq eki qutqarý operatsııasy Abaı aýdanynda júrgizildi. Saǵat 04:25-te «Jartas-Volnyı» avtojolynyń 6-shy shaqyrymynda aqaýly avtokólikten 5 adam qutqaryldy jáne Abaı qalasyna jetkizildi. Saǵat 06:50-de «Qaraqoǵa-Jartas» avtojolynyń 2-shi shaqyrymynda qutqarýshylar 3 jolaýshysy bar avtomobıldi joldyń tazartylǵan ýchaskesine deıin súıredi.
Saǵat 07:30-da Shet aýdanynda «Almaty-Ekaterınbýrg» tasjolynyń 843 shaqyrymynda aqaýly jeńil avtokólikten 3 adam qutqaryldy, onyń ishinde bir bala bolǵan. Qutqarylǵandar Aqsý-Aıýly aýylyna jetkizildi. Jolaýshylar medıtsınalyq kómekti qajet etpegen.
Qutqarýshylar kólik júrgizýshilerine temperatýra tómendep, joldardy qar basqanda jáne kóktaıǵaqta múmkindiginshe jolǵa shyqpaýdy suraıdy. Sondaı-aq júrgizýshiler avtojoldardyń jaı-kúıi týraly aqparatty baqylap, avtomobıldiń jaramdylyǵyn muqııat tekserýi tıis.
«Qoǵamdyq kólik pen dızeldik qozǵaltqyshy bar avtokólik ıeleri men júrgizýshileriniń qaýipsizdik sharalaryna erekshe nazar aýdarýyn ótinemiz. Sondaı-aq, aýyldyq jerde turatyn turǵyndarǵa meteojaǵdaı nasharlaǵan jaǵdaıda alys qashyqtyqqa jaıaý saıahattan bas tartý usynylady», - dep habarlady Qaraǵandy oblysy TJD baspasóz qyzmeti.
