Qaraǵandy oblysynyń jedel járdem qyzmeti úshin 36 reanımobıl satyp alyndy
QARAǴANDY. QazAqparat – Qaraǵandy oblysynyń Jedel járdem parki 36 jyljymaly medıtsınalyq keshenmen tolyqty. Taǵy 24 kólik jyl sońyna deıin jetkiziledi. Reanımobılder respýblıkalyq bıýdjet esebinen satyp alyndy, dep habarlaıdy QazAqparat tilshisi.
Sanıtarııalyq avtokólik qajetti medıtsınalyq jabdyqtarmen qamtamyz etilgen: ÓJJ-apparattarymen, patsıenttiń monıtorlarymen, defıbrıllıatorlarmen, aǵa kezekshi dárigerge derekterdi berý fýnktsııasy bar elektrokardıograftarmen. Sondaı-aq, qajetti reanımatsııalyq sharalardy ótkizýge arnalǵan tolyq jıyntyq bar. Mashınalar ártúrli jıyntyqta: mamandandyrylǵan brıgadalarǵa arnalǵan S klasty reanımobılderden feldsherlik brıgadalarǵa arnalǵan A klasty avtomobılderge deıin. Reanımobılder oblystyń barlyq qalalary men aýdandaryna taratylady. Bul óz kezeginde jedel járdem qyzmeti parkiniń 60%-yn jańartýǵa jáne qosalqy stantsııalarda rezervtik quram jasaýǵa múmkindik beredi.
«Búgin oblysqa 36 reanımobıl keldi. Jyl sońyna deıin taǵy 24-i jetkiziledi. Bul kólikter Densaýlyq saqtaý mınıstrliginiń qoldaýymen jetkizilýde. Jalpy, óńirde koronavırýsqa baılanysty túrli jaǵdaılarǵa daıyndyq boıynsha úlken jumystar júrgizilýde. Búgin 44 aýrýhana kez-kelgen ýaqytta jumysqa kirisýge daıyn. Sondaı-aq, biz dárigerler úshin barlyq qajetti tehnıkalyq jáne basqa da jaǵdaılardy jasaýymyz kerek. Bul jańa kólikter olardyń jumysyna kómektesedi», - dedi Jeńis Qasymbek.
Jalpy, jyl basynan beri oblysqa ártúrli modıfıkatsııadaǵy jáne ótimdiliktegi 300-ge jýyq medıtsınalyq maqsattaǵy mashına keldi.
Avtoparkti jańartý Qaraǵandy óńiriniń turǵyndaryna medıtsınalyq kómek kórsetýdiń sapasy men ýaqtylyǵyn aıtarlyqtaı jaqsartýǵa múmkindik beredi.
