Qaraǵandy oblysynyń Jáırem kentinde baıqalǵan erekshe bulttar jurttyń úreıin týdyrdy
QARAǴANDY. QazAqparat – Qaraǵandy oblysynyń Jáırem kentiniń mańynda túzilgen erekshe bulttar jurt arasynda dúrbeleń týdyrdy. Áleýmettik jelide paıda bolǵan vıdeonyń astynda paıdalanýshylar «belgisiz bireýler vırýs shashyp jatyr» degen pikirler qaldyrýda, dep habarlaıdy QazAqparat tilshisi.
Jurttyń úreıin týdyrǵan beınetúsirilim búgin áleýmettik jeliler arqyly tarady. Keıbirjeli qoldanýshylar ony bireýler vırýsty turǵyn úılerdiń ústinen shashyp jatyr dep boljam jasap ta úlgergen.
Qaraǵandy oblysy ákiminiń baspasóz qyzmeti bul aqparatty joqqa shyǵardy.
«Bul tótenshe jaǵdaı emes, atalǵan qubylys jóninde Qazgıdromet mamandary túsinikteme berdi. Tańǵy glorııa-bul sırek kezdesetin meteorologııalyq qubylys, ol kóldeneń buralǵan bulttar túrinde kórinedi. Bulttar bıiktigi 1-den 2 km-ge deıingi naızaǵaıly jıekti qurap, kóbinese jerden 100-200 metr bıiktikte (biraq ádette joǵary) ornalasady. Onyń uzyndyǵy 1000 km-ge deıin jetip, saǵatyna 60 km jyldamdyqpen qozǵalady. «Tańǵy glorııa» kóbine qatty jel jáne jer betindegi qysymnyń ózgerýinen paıda bolady Bulttyń aldynda oǵan belgili bir pishin beretin jyldam vertıkaldi qozǵalys paıda bolady. Kóbine bul qubylys naızaǵaı bastalǵanǵa deıin paıda bolady», - dep jazdy Facebook-tegi óz paraqshasynda Qaraǵandy oblystyq ákimdiginiń baspasóz hatshysy Marına Shapovalova.
Beınekórinistiń astyna keıbireýler «belgisiz adamdar vırýs shashyp jatyr» dep jazba qaldyrǵan. Basqalary, kerisinshe, «bul koronavırýspen kúresetin belgisiz zat» deıdi.
Bul vırýstyń taralýy emes, tabıǵattyń sırek kezdesetin qubylysy ekenin QR Ekologııa, geologııa jáne tabıǵı resýrstar mınıstrliginiń «Qazgıdromet» RMK de rastady.
«Qaraǵandy oblysy Jáırem kenti turǵyndarynyń vıdeosy boıynsha túsirilgen qubylys orama bulty (volutus) ekenin habarlaımyz. Orama bulttar óz osin aınalyp júrgendeı áser qaldyratyn tútik tárizdi uzyn, ádette tómen ornalasatyn, kóldeneń bult massasy. Orama bulttar basqa bulttarǵa qosylmaǵan solıton jáne Jer atmosferasyndaǵy tolqyndardyń buzylýynyń mysaly bolyp tabylady. Bul túr negizinen qabatty kýmýlonımbýsqa jáne sırek jaǵdaılarda joǵary sáýleli bulttarǵa tán. Mundaı bulttar sýyq aýanyń sýyq aýa aǵyndarynan shyǵýy nátıjesinde paıda bolady. Óte sırek kezdesetin, biraq bulttardyń erekshe túrleriniń biri», - dep habarlady «Qazgıdromet» RMK.
