Qaraǵandy oblysynyń jas dárigerlerine páterler berildi

QARAǴANDY. QazAqparat - QR Densaýlyq saqtaý mınıstri Eljan Birtanov jáne Qaraǵandy oblysynyń ákimi Erlan Qoshanov Abaı qalasynyń jas dárigerlerine vedomstvolyq páterlerdiń kiltterin tabys etti, dep habarlaıdy QazAqparat.

Qaraǵandy oblysy ákimdiginen málim etkendeı, jıhazdarmen jáne qajetti barlyq turmystyq tehnıkaken jabdyqtalǵan baspanalar 13 mamanǵa berildi. Olardyń barlyǵy Abaı qalasynyń Ortalyq aýrýhanasynda qyzmet etetin bolady. Qonys toıyn toılaýshylar arasynda jalpy tájirıbelik tórt dáriger, eki pedıatr, eki anestezıolog-reanımatolog, onkolog, travmatolog-ortoped, oftalmolog, nefrolog jáne neonatolog bar.
«Jas mamandarǵa shyn máninde eleýli qoldaý kórsetetin Qaraǵandy oblysynyń ákimdigine alǵys aıtqym keledi. Bul tek turǵyn úı berý ǵana emes, sonymen qatar kótermeaqy tóleý. Bizder, medıkter úshin, ózimizdi tolyqtaı jumysqa arnaı alatyndaı jaǵdaı jasalýy óte mańyzdy. Bıyl mindetti medıtsınalyq saqtandyrý júıesin engizý qarsańynda bul ásirese mańyzdy. Biz óz jelimizdi ásirese, aýyldyq aýdandarda keńeıtemiz. Sondyqtan jergilikti jerlerde qoldaý óte mańyzdy, - dedi Eljan Birtanov.
Qaraǵandy oblysynyń ákimi Erlan Qoshanov atap ótkendeı, jas dárigerlerge vedomstvolyq baspana berý arqyly óńirde kardrlyq tapshylyqty anaǵurlym tómendetýge múmkindik týdy.
«Búgingi tańda Abaıǵa 13 jas maman keldi. Osynyń arqasynda bul qaladaǵy medıtsınalyq kadrlar tapshylyǵyn tolyqtaı jaba alamyz. Osy kúnge deıin dárigerlerge 100-den astam páter kiltterin tabys ettik. Al búgin Abaı qalasynyń jas dárigerlerin qonys toıymen quttyqtaımyz. Barlyqtaryńyzǵa osy jerde baqyttaryńyzdy tabýǵa tilektespin», - dedi aımaq basshysy.
Esterińizge sala keteıik, buǵan deıin Saran men Shahtınsk qalalarynda jas dárigerlerge vedomstvolyq páterlerdiń kiltteri tabys etilgen bolatyn. Mundaı tájirıbe óńirge tek osy jyly ǵana medıtsınalyq joǵary oqý oryndarynyń 458túlegin tartýǵa múmkindik berdi. Olardyń 81-i aýyldyq jerlerde «Dıplommen - aýylǵa» baǵdarlamasy boıynsha jumys isteıdi. Turǵyn úıge muqtaj barlyq jas mamandardy qamtamasyz etý úshin densaýlyq saqtaý basqarmasy aldaǵy úsh jylda 281 páterdiń kiltin berýdi josparlap otyr. Olardyń 27-in dárigerler osy jyldyń sońyna deıin alady.

Eske salaıyq, keshe mınıstr Eljan Birtanov saparmen Qaraǵandy oblysyna bardy.