Qaraǵandy oblysynyń Jańaarqa aýdanynda jańa nysandar salynady
QARAǴANDY. QazAqparat – Bıylǵy jyly Qaraǵandy oblysynyń Jańaarqa aýdanynda 500 oryndyq mektep, 25 metrlik júzý basseıni men jańa úıler salynýy tıis. Sondaı-aq, 13 kósheni jóndeý josparlanǵan. Qaraǵandy oblysynyń ákimi Jeńis Qasymbek bıýdjet aqshasyn ne úshin jáne qalaı jumsaıtynyn tekserip qaıtty, dep habarlaıdy QazAqparat tilshisi.
Jol jumystarynyń sapasyn baqylaý asfalt shyǵaratyn zaýyttan bastalady. Aýdanda jaqynda ǵana «Arqa Qurylys – 2009» jańa kásiporny jumys isteı bastady. Ol saǵatyna 80 tonna asfalt shyǵarýǵa qaýqarly. Jeńis Qasymbekke aýdanda eki asfalt zaýyty bary aıtyldy. Olardyń qýattylyǵy aýdandyq jáne oblystyq joldardy jóndeý kezinde suranysqa ıe bolady.
Joldardy jaqsartýmen qatar, Jańaarqalyqtar úshin kóshe jaryǵy ornatylmaq. Ol birden tórt kóshede paıda bolýy kerek. Sonymen qatar, eki oıyn alańy jabdyqtalǵan.
Aýdan boıynsha jumys sapary barysynda Jeńis Qasymbekke eki mańyzdy áleýmettik nysannyń qurylys barysy týraly baıandaldy. Jańaarqada «Jumyspen qamtýdyń jol kartasy» baǵdarlamasy boıynsha 500 oryndyq mekteptiń qurylysy júrip jatyr. Jumysshylar keste boıynsha jumys istep jatyr jáne jyldyń sońyna deıin qurylys aıaqtalýy tıis. Kúzge qaraı munda taǵy bir nysan – 25 metrlik júzý basseıni tapsyrylady dep kútilýde.
Aýdan ortalyǵynda jańa «Jańa Nur» shaǵynaýdany boı kóterýde, onda bastapqy turǵyn úı satyp alý memlekettik baǵdarlamasy boıynsha kóp balaly otbasylar úshin úıler salynýda. Ortalyq aýrýhana mańynda 8 páterli nesıelik úıdiń qurylysy aıaqtalýda. Bir 18 páterlik jáne úsh 36 páterlik úılerdiń qurylysyna da jýyrda kiriside. Olardyń ekeýi jalǵa beriletin bolady.
Oblys basshysy Eralıev aýyldyq okrýgine baryp, fermerlermen kezdesip, olardyń ózekti máselelerin talqylady. Sonymen qatar, aýylda ashylǵan kúres zaly men hokkeı kortyn aralap kórdi. Bul nysandardy qalpyna keltirý tek bıýdjet esebinen ǵana emes, sonymen birge jergilikti turǵyndardyń óz aýylynyń damýyna úlesterin qosyp, kómek kórsetýniń arqasynda jóndeldi.
«Eralıev aýylynda kóshelerdi jóndeýge qosymsha bıýdjet bólemiz. Turǵyndardyń ótinishi boıynsha mádenıet úıin qajetti tehnıkamen qamtamasyz etemiz, al kitaphana qoryn Qazaqstannyń zamanaýı avtorlarynyń kitaptarymen tolyqtyramyz», – dedi oblys ákimi.
Óńir basshysy «Saryarqa ENERGY» JShS «Jalyn» kómir kenishinde boldy. Kenishte 2020 jyly 407,5 myń tonna kómir óndirildi, jalpy alǵanda jylyna mıllıon tonnadan kómir óndirý josparlanýda.
Jumys saparynyń sońynda Jeńis Qasymbek jergilikti jerlerdegi jeke jaýapkershilikti eske sala otyryp, júrgiziletin jumystardyń sapasyn jáne kesteniń saqtalýyn baqylaýdy tapsyrdy.
