Qaraǵandy oblysynyń úsh eldi mekeni Qazaqstannyń «30 úzdik aýyly» qataryna endi
Joba Qazaqstan Táýelsizdiginiń 30 jyldyǵyna oraı «Tulǵa – dostyq» qoǵamdyq birlestiginiń bastamasymen júzege asyryldy. Onyń aıasynda albom-anyqtama shyǵaryldy. Oǵan elimizdiń eń kórnekti aýyldary týraly fotosýretter men málimetter kirdi.
Joba avtory jáne «30 úzdik aýyl» albom-anyqtamasynyń avtory – aqyn, QR Jazýshylar odaǵynyń múshesi jáne «Tulǵa-dostyq» qoǵamdyq birlestiginiń jetekshisi Murathan Shoqan.
«Bıyl Qazaqstannyń Táýelsizdik alǵanyna 30 jyl tolady. Memleket basshysy Qasym-Jomart Toqaev mereıtoılyq dataǵa oraı oıyn-saýyq sıpatynda ǵana emes, ózinen keıin de tereń iz qaldyratyn erekshe jobalar jasaýdy tapsyrdy. Osylaısha mende «30 úzdik aýyl» jobasyn qurý ıdeıasy paıda boldy. Men 14 oblystyń ákimdikterine júgindim, olar maǵan eń perspektıvaly aýyldardyń tizimin berdi. Jaz boıy olardy aralap shyqtym, olardyń damýyn óz kózimmen baǵalap, fotosýretter men basqa da materıaldardy jınadym. Baǵalaý úshin halyqaralyq ólshemder qoldanyldy», – dep atap ótti Murathan Shoqan.
Avtordyń pikirinshe, úzdik otyzdyqqa Qaraǵandy oblysynyń úsh aýyly – Nura aýdanynyń Shahterskoe, Qaınar aýyldary jáne Jańaarqa aýdanynyń Eralıev atyndaǵy aýyly kirdi.
«Bul aýyldarda turǵyndardyń jaılylyǵy úshin barlyq jaǵdaı jasalǵan. Mysaly, Shahterskoe aýylynda jergilikti kásipker jáne metsenat Georgıı Prokop basseın men basqa da nysandardy salýǵa kómektesti. Ol óziniń týǵan aýylynyń ǵana emes, jalpy aýdannyń, tipti oblystyń damýyna baǵa jetpes úles qosady. Jańaarqa aýdanynyń Eralıev aýyly Gınnestiń rekordtar kitabyna endi – onda óndiriletin qymyz bárine belgili. Bul eldi mekende erekshe, dostyq atmosfera seziledi, turǵyndar ulttyq salt-dástúrlerge qurmet kórsetedi jáne sonymen birge zamanǵa saı ómir súredi», – dep atap ótti aqyn.
«30 úzdik aýyl» jobasy sonymen qatar týǵan ólkeniń damýyna baǵa jetpes úles qosqan kórnekti aýyl turǵyndary týraly baıandaıdy.
«Osyndaı adamdar týraly aıta otyryp, biz olardyń úlgisine basqalardyń da eliktegenin qalaımyz. Óıtkeni tek birlesip qana aýyldaǵy ómirdi jaqsarta alamyz. Anyqtamalyq albomnyń tusaýkeseri 16 qazanda QR Ulttyq akademııalyq kitaphanasynda ótti. Albom demeýshilerdiń qoldaýymen shyǵaryldy. Onyń taralymy – 2 myń dana. Sondaı-aq, jaqyn arada onyń elektrondy nusqasy jasalady. Budan basqa, bolashaqta men Nur-Sultanda «30 úzdik aýyl» alleıasyn qurǵym keledi, onda árbir adam óz bastaýlaryna qol jetkize alady. Óıtkeni biz bárimiz aýyldan shyqqanbyz. QR-kodtardy skanerleı otyryp, qandaı da bir aýyl týraly aqparat alýǵa jáne onyń ómirimen tanysýǵa bolady», - dep qosty joba avtory.
