Qaraǵandy oblysynyń úsh aýdanynda dalada órt shyqty
QARAǴANDY. QazAqparat – Qaraǵandy oblysynda Qarqaraly, Aqtoǵaı jáne Osakarovka aýdandarynda dalada órt shyqty, dep habarlaıdy QazAqparat tilshisi.
2 tamyzda Buqar jyraý aýdanynda Novostroıka aýylynan shyǵysqa qaraı 10 shaqyrym qashyqtyqta 45 gektar aýmaqta qurǵaq shóp jandy. Órtti sóndirýge Qaraǵandy oblystyq TJD bólimsheleri (25 qyzmetker men 5 tehnıka) men erikti órt sóndirý qurylymdary (22 qyzmetker men 15 tehnıka) jumyldyryldy.
Órt tehnıka kire almaıtyn jerde shyqqan. Usaq shoqylar men butalar órt sóndirýge kedergi keltirse, jel men qurǵaq shóp saldarynan tilsiz jaý tez taraǵan. Órt sóndirýshiler birneshe shaqyrym jerge baryp sý ákelýge májbúr bolǵan.
Dalalyq órtti sóndirýge jergilikti atqarýshy organdar jaýapty bolsa da, TJD bólimderi shalǵaıdaǵy aýdandarǵa kómektesýge baryp jatyr.
Qazirgi ýaqytta Qaraǵandy oblysyndaǵy Qarqaraly, Aqtoǵaı jáne Osakarovka aýdandarynda dalalyq órt shyǵyp jatyr. Órttiń barlyǵyna TJD kúshteri tartyldy. Jyl basynan beri oblysta 241 dalalyq órt tirkelse, onyń ishinde 187-i TJD bólimderiniń qatysýymen sóndirildi.
Órt 7 myń gektar aýmaqty sharpyǵan. Kóp jaǵdaıda tabıǵı órt adamdardyń abaısyzdyǵynan: sóndirilmegen ottan, temeki tuqylynan, qoqysty órteýden, eski shópten, kún túsetin jerge tastalǵan shyny qaldyǵynan jáne taǵy basqa sebepterge baılanysty shyǵady. Sondyqtan, ormandar men dalalyq jerlerde jaýyn-shashyn joq kezde otty abaılap qoldanǵan jón.
Agata Muhamedjanova
