Qaraǵandy oblysynyń turǵyny ınternette zańsyz dári satyp kelgen
QARAǴANDY. QazAqparat – Qaraǵandy oblysynyń tártip saqshylary ınternet arqyly dárilik preparattardy zańsyz satý faktisin anyqtady. Tergeý barysynda jedel ýákilder Balqash qalasynyń turǵynyn ustady, dep habarlaıdy QazAqparat tilshisi.
5 shilde kúni Balqash qalalyq polıtsııa bólimi esirtki qylmysyna qarsy kúres bólimshesiniń qyzmetkerleri áleýmettik jelilerge monıtorıng júrgizý barysynda dári-dármekterdi zańsyz satý faktisin anyqtaǵan. Habarlandyrýlarǵa sáıkes, paraqshanyń avtory «Antarıs» dárilik preparatyn satýmen aınalysqan. Bul preparat qant dıabetimen aýyratyn adamdardy emdeýge arnalǵan. Belgili bolǵandaı, dári-dármekterge lıtsenzııa bolmaǵan jáne olar dárigerdiń retseptisiz satylyp kelgen.
«Satýshy Balqash qalasynyń 49 jastaǵy turǵyny bolyp shyqty. Polıtsııa qyzmetkerleri onyń ınternet arqyly «Antarıstyń» 6 qaptamasyn (180 tabletkasyn) satyp úlgergenin anyqtady», - dep habarlady Qaraǵandy oblysy Polıtsııa departamentiniń baspasóz qyzmetinen.
Atalǵan fakti boıynsha ákimshilik hattama toltyryldy. Materıal QR ÁQBK 424-baby «Zańsyz medıtsınalyq jáne (nemese) farmatsevtıkalyq qyzmet» boıynsha ákimshilik sotqa qaraýǵa jiberildi.
