Qaraǵandy oblysynyń turǵyny Astanaǵa bir kelige jýyq geroın ótkizbekshi boldy
ASTANA. 15 qazan. QazAqparat - Astana qalalyq esirtki bıznesine qarsy kúres basqarmasynyń qyzmetkerleri elordaǵa esirtki jetkizý arnasyn anyqtap, joıdy.
Bul týraly astanalyq ІІD-niń baspasóz qyzmetinen habarlady.
Qala kireberisindegi «Qyzyl-Jar» beketinde Astana qalalyq ІІD-niń esirtki bıznesine qarsy kúres basqarmasynyń qyzmetkerleri Qaraǵandy-Astana baǵytymen kele jatqan shaǵyn jolaýshylar avtobýsyn tekserdi. Jolaýshylar men olardyń jeke zattaryn arnaıy ıttiń kómegimen tekserý kezinde kir jýý untaǵynyń qorapshasynda esirtki zaty anyqtaldy. Ol avtobýs jolaýshylarynyń biri, Qaraǵandy oblysynyń 36 jastaǵy turǵynynyń zattarynyń arasynan tabyldy.
Ótkizilgen saraptamanyń nátıjesinde, tabylǵan zat salmaǵy 813 gramnan asatyn, baǵasy shamamen 2,5 mln. teńgeni quraıtyn «geroın» esirtkilik zaty ekendigi anyqtaldy. Sondaı-aq ustalǵan áıel buǵan deıin de qylmystyq jaýapkershilikke tartylǵandyǵy belgili boldy.
Atalǵan fakti boıynsha QR QK-niń 259-baby, 2-bólimimen qylmystyq is qozǵaldy. Ustalǵan azamatsha Astana qalalyq ІІD-niń ýaqytsha ustaý abaqtysyna qamaldy. Tergeý amaldary júrgizilýde.
