Qaraǵandy oblysynyń turǵyndaryna medıtsınalyq saqtandyrý qory 1,48 mlrd teńge tóledi
QARAǴANDY. QazAqparat – 2021 jyldyń 4 aıynda oblystyń medıtsınalyq uıymdarynda óńirdiń 8 200-den astam turǵyny ońaltý eminen ótti. Bul kómekti tóleýge medıtsınalyq saqtandyrý Qory 1,48 mlrd teńge baǵyttady, dep habarlaıdy QazAqparat tilshisi.
Bul qarajatty Ońaltý ortalyqtary, sanatorııler, emhanalar aldy, onda patsıentter ekinshi jáne úshinshi kezeńdegi ońaltý boıynsha emdeldi.
2021 jylǵa Qaraǵandy oblysynda medıtsınalyq ońaltýǵa barlyǵy 4 085 717 000 teńge bólindi, onyń ishinde koronavırýstyq ınfektsııaǵa shaldyqqannan keıin ońaltýǵa – 307,3 mln teńge.
Qaraǵandy oblysynda operatsııadan nemese aýrýlardan keıin óńirdiń 12 ortalyǵynda ońaltý emin alýǵa bolady. Ambýlatorııalyq deńgeıde bul kómekti oblystyń 14 emhanasy kórsetedi.
Medıtsınalyq ońaltý kimge kórsetiledi
Naýqas birneshe jaǵdaıda medıtsınalyq ońaltýdy ala alady:
- negizgi nemese sozylmaly aýrýdy emdeý qajet bolǵanda;
- qatty aýyrsynýdan keıin;
- hırýrgııalyq operatsııalardan keıin;
- jaraqat alǵannan keıin;
- syrqat saldarynan adamnyń qımyl-qozǵalysy shektelgen jaǵdaılarda ótýge bolady.
Alǵash ret ońaltýdan ótý úshin qaıda júginý kerek
Medıtsınalyq kómektiń kez kelgen túrin alý sııaqty, medıtsınalyq ońaltýdan ótý úshin tirkelgen jeri boıynsha emhanaǵa ýchaskelik dárigerge júginý qajet.
Emdeýshi dáriger reabılıtolog mamanǵa nemese mýltıdıstsıplınarlyq top mamandaryna jiberedi.
Olar aýrýdyń paıda bolýy men kúsheıýi, syrqattyń densaýlyq jaǵdaıyna baılanysty málimetterdi eskere otyryp, ońaltýǵa degen qajettilikti aıqyndaıdy. Bastapqy reabılıtatsııalyq dıagnoz qoıyp, patsıent densaýlyǵyn qalpyna keltirý josparyn, kýrstyń merzimin t. b. anyqtaıdy.
Eger keshendi tekserý nátıjesinde reabılıtatsııa tıimdi dep tabylsa, patsıent ony ambýlatorııada, statsıonarda, statsıonardy almastyratyn emdeý mekemesinde, úıde nemese sanatorııa-kýrorttarda óte alady. Josparly túrde em qabyldaıtyn patsıent statsıonarǵa «Aýrýhanaǵa jatqyzý bıýrosy» portaly arqyly jatqyzylady.
