Qaraǵandy oblysynyń turǵyndary Astanaǵa qaıyrymdylyq kómek kórsetkeni úshin alǵys bildirdi
ASTANA. QazAqparat - Qaraǵandy oblysynyń ákimi Baýyrjan Ábdishev Astana qalasynyń basshysy Imanǵalı Tasmaǵambetovke jáne elorda turǵyndaryna Kókpektidegi sý tasqynynan zardap shekkenderge qoldaý kórsetkenderi úshin alǵysyn bildirdi.
Bul týraly astana.kz saıtyna Astana qalasynyń ákimi apparatynyń baspasóz qyzmetinen habarlady.
«Kókpektidegi sý tasqynynan zardap shekken turǵyndarǵa kórsetken qoldaýyńyz úshin Sizge ózimniń jáne barsha Qaraǵandy jurtynyń atynan alǵysymdy bildirýge ruqsat etińiz. Kúni keshe birinshi bolyp elordamyz Astana jurtshylyǵynan 20 tonna gýmanıtarlyq kómek kerýeni kelip jetti. Kókpekti turǵyndary qıyn kezde qol ushyn sozǵan barsha astanalyqtarǵa ystyq yqylastary men júrekjardy alǵystaryn bildirýde», - delingen habarlamada.
Eske salaıyq, 3 sáýirde elorda turǵyndarynyń atynan Qaraǵandy oblysyna sý tasqynynan zardap shekkenderge 20 tonnadan astam asa qajetti taýarlar jóneltildi. Qaıyrymdylyq kómek 200-den astam adamǵa eseptelgen, ol bir aıǵa jetýi tıis.
