Qaraǵandy oblysynyń turǵyndary 7-Qysqy Azııa oıyndarynyń Alaý estafetasyn asyǵa tosýda

Alaý 28 qańtar kúni Taldyqorǵan qalasynan ushaqpen jetkiziledi. Estafetanyń Qaraǵandy qalasy boıynsha jalpy uzyndyǵy 9 shaqyrymdy quraıdy. Onyń baǵyty Táýelsizdik eskertkishi ornatylǵan Jeńis saıabaǵynan bastalyp, qalanyń eń kórnekti jerlerimen atap aıtqanda, N.Ábdirov, Buqar jyraý jáne Abaı eskertkishteri men S.Seıfýllın atyndaǵy teatr ornalasqan kóshelermen ótip, «Shahterlar» stadıonynda márege jetedi.

Al Temirtaý qalasynda estafeta 3 shaqyrymǵa sozylady. Ol Metallýrgter kóshesindegi meshit ǵımaratynan bastaý alyp, Metallýrgter eskertkishin boılaı Respýblıka dańǵylymen Muz aıdyny sport saraıyna kelip toqtaıdy.

Alaýgerlerdiń arasynda post keńestik kezeńde jáne táýelsiz Qazaqstan shejiresinde el namysyn asqaqtatqan sportshylar atap aıtqanda, KSRO-nyń eńbek sińirgen sport sheberi Serik Nurqazov, jeńil atletıka boıynsha Qazaqstan Respýblıkasynyń eńbek sińirgen sport sheberi Dmıtrıı Karpov, bokstan QR eńbek sińirgen sport sheberi Serik Eleýov, shańǵymen jarys jáne bıatlon boıynsha KSRO-nyń eki dúrkin chempıony Sergeı Grıshın, bıatlonnan KSRO sport sheberi Revger Skýpov, konkımen júgirý sporty boıynsha KSRO-nyń sport sheberi normatıvin oryndaǵan QazKSR-daǵy alǵashqy áıel Roza Jumadildına, paýerlıftıngten Qazaqstannyń alty dúrkin chempıony, jastaıynan múgedek Oleg Pýzıkov bar.

Alaýger bolý qurmeti sonymen birge, metallýrgııa jáne kómir óndirý salasyna eńbekteri sińgen qaıratkerler men estrada juldyzdary, qoǵam qaıratkerleri ıe boldy. Olardyń ishinde otandyq estrada juldyzdary, erli-zaıyptylar Qydyráli Bolmanov pen Qaraqat Ábildına, Qazaqstannyń eńbek sińirgen qaıratkeri Bekbolat Tileýhan bar.

Alaýgerlerdiń qatarynda sondaı-aq, «QazAqparat» agenttiginiń tilshisi, Qysqy Azııa oıyndarynyń Alaý estafetasyn nasıhattaý boıynsha jýrnalıster arasynda ótken respýblıkalyq baıqaýdyń jeńimpazy Gúlmıra Álıakparova bar.

Azıada Alaýy Qaraǵandy oblysynan keıin avtokolonnamen Astanaǵa jetkiziletin bolady.