Qaraǵandy oblysynyń tórt aýdanynda shegirtkege qarsy ý sebildi

QARAǴANDY. QazAqparat - Qaraǵandy oblysynda aýyl sharýashylyǵy jerlerin hımııalyq óńdeý boıynsha jumystar aıaqtaldy. Mamandar 8 myń gektarǵa jýyq jerdi óńdedi, dep habarlaıdy QazAqparat tilshisi.

Qaraǵandy oblysynyń tórt aýdanynda saıaq shegirtkelerdi joıý úshin hımııalyq óńdeý jasaldy. Jumystar «Aýyl sharýashylyǵy daqyldarynyń zııandy organızmderine qarsy kúres jónindegi is-sharalar» bıýdjettik baǵdarlamasy sheńberinde júrgizildi. Jalpy alǵanda, memlekettik jer qorlaryna jatatyn 7890 ga jer óńdeldi.

«Hımııalyq óńdeý Abaı aýdanynyń Esengeldi aýyldyq okrýginde 900 ga alańda, Buqar Jyraý aýdanynyń Aqbel aýyldyq okrýginde – 1500 ga, Nura aýdanynyń Prjeval, Egindi, Ahmeshit jáne Kóbeıtas aýyldyq okrýgterinde – 1950 ga, Qarqaraly aýdanynyń Yntaly, Amanjol jáne Temirshi aýyldyq okrýgterinde – 3450 ga jerinde júrgizildi», – dep habarlady Qaraǵandy oblysynyń Aýyl sharýashylyǵy basqarmasynda.