Qaraǵandy oblysynyń taýar óndirýshileri Astanadaǵy jármeńkege 850 tonna ónim ákeledi
ASTANA. QazAqparat - Aldaǵy demalys kúnderi, 10-11 qazanda elorda turǵyndary úshin Qaraǵandy oblysynyń úzdik aýyl sharýashylyǵy taýar óndirýshileri óz ónimderin usynady, dep habarlady astana.gov.kz.
Taýar óndirýshiler jalpy somasy 149,7 mln. teńgeni quraıtyn 850 tonnaǵa jýyq ónim ákeledi. Bul joly aýyl sharýashylyǵy jármeńkesi «Han shatyr» SOO aldyndaǵy alańda ótedi.
Astana qalasy Aýyl sharýashylyǵy basqarmasynyń habarlaýynsha, jármeńkede et ónimderi, balyq jáne qus eti, shujyq, sút ónimderi men bal, sondaı-aq, jemis pen kókónistiń túr-túri usynylady.
Qazaqstan oblystary taýar óndirýshileriniń qatysýymen ótetin apta saıynǵy jármeńkelerdi Astana qalasy ákimdigi azyq-túlik baǵasyn turaqtandyrý maqsatynda uıymdastyrady. Qala turǵyndary jármeńkede taýar ónimderin naryqtaǵy baǵadan 15-20% arzanǵa satyp ala alady.
Eske salaıyq, Qazaqstan óńirleri taýar óndirýshileriniń qatysýymen ótetin aýyl sharýashylyǵy jármeńkelerinen bólek, Astana men Aqmola óńiriniń taýar óndirýshileri de óz ónimderin halyqqa usynady. Jármeńke elordanyń úsh aýdanynda: «Almaty» aýdanynda - Abylaı han dańǵyly men B. Momyshuly dańǵylyndaǵy Oqýshylar saraıynyń aldyndaǵy alańda, «Esil» aýdanynda - Saýran kóshesindegi «Halyqqa qyzmet kórsetý ortalyǵynyń» aldyndaǵy alańda jáne «Saryarqa» aýdanynda - Bógenbaı batyr dańǵylyndaǵy «Kóktem» SO-da uıymdastyrylady.
