Qaraǵandy oblysynyń sýpermarketteri sóreler men azyq-túlik sebetterin dezınfektsııalaýda
QARAǴANDY. QazAqparat - Qaraǵandy oblysynda sanıtarlyq baqylaýdyń kúsheıtilgen rejımine 2 661 nysan aýystyryldy. Bul saýda,oıyn-saýyq ortalyqtary, sýpermarketter, dúkender jáne adamdar kóp jınalatyn basqa da oryndar. Bul týraly tikeleı efırde Taýarlardyń jáne qyzmetterdiń sapasy men qaýipsizdigin baqylaý departamentiniń basshysy Qanat Asqarov habarlady.
«Biz sýpermarketterdiń iri jelileriniń ıelerimen áńgimelesý ótkizdik. Oblys boıynsha barlyǵy 919 qolǵa sebiletin sanıtaızerler ornatyldy. Barlyq sebetter, arbalar, taýar sóreleri kúnine birneshe ret dezınfektsııalyq eritindilermen óńdeledi», - dedi ol.
Qaraǵandy oblysynda barlyǵy 473 nysan jabyldy. 12 kınoteatr, saýda, oıyn-saýyq kesheni janyndaǵy 44 balalar oıyn alańy, 167 mektepten tys qosymsha bilim berý uıymy jáne basqa da oıyn-saýyq oryndary jumys istemeıdi.
Sanıtarlyq rejım 1971 nysanda kúsheıtilgen.
Shirkeýlerde, meshitterde, sınagogalarda kelýshilerdiń sanyn ýaqytsha shekteý usynylǵan. Sanıtalyq dárigerler jamaǵatqa namazdar men shoqyný rásimderin úılerinde ótkizýge keńes beredi.
Taýarlar men kórsetiletin qyzmetterdiń sapasyn baqylaý departamentiniń mamandary Qaraǵandy oblysyndaǵy 17 avtoparkti baqylaıdy. Barlyq jolaýshylar avtobýstaryn reıs bastalar aldynda jáne aıaqtalǵannan keıin dezınfektsııalaý quraldarymen óńdeıdi.
Dezınfektsııalyq quraldardy qoldana otyryp ylǵaldy jınaý kúnine eki ret vokzaldarda, avtostantsııalarda, HQO-da, qonaq úılerde, dárihanalarda, dúkenderde jáne basqa da qoǵamdyq oryndarda júrgiziledi.
Qaraǵandy áýejaıyna kelgenderdiń barlyǵyn dárigerler tekseredi, sodan keıin kez-kelgen elden ushyp kelgender karantınge jiberiledi.
Esterińizge sala keteıik, búgingi kúni Qaraǵandy oblysynda koronavırýsty juqtyrýdyń birde-bir oqıǵasy tirkelgen joq. Degenmen, aımaq turǵyndaryna múmkindiginshe úıde qalýdy, qoldaryn jáne betin sabynmen jıi jýýdy, antıseptıkterdi paıdalanýdy, adamdar kóp jınalatyn jerlerden aýlaq bolýdy jáne dúkenderge otbasy músheleriniń bireýin ǵana jiberýdi usynady.
